Politiets rolle og oppgåver

• Politiet skal ha sterk lokal forankring med mange oppgåver som gjev god kontakt med publikum.
• Etaten skal i enda sterkare grad samvirke med kommunen, og andre offentlege og private aktørar.
• Det er viktig at kvardagsleg kriminalitet vert etterforska og oppklåra.
• Politiet skal også i framtida vere uvæpna, men trena for skarpe oppdrag.

Det er justisminister Odd Einar Dørum som framhever dette i samband med at Regjeringa legg fram stortingsmelding nr. 42 (2004-2005) ”Politiets rolle og oppgaver”.

– Norsk politi nyt stor tillit. Regjeringa vil derfor ikkje gjere store endringar i politiet si rolle og etaten sine oppgåver i samfunnet, men føre vidare dei viktigaste elementa i noverande politiordning. Dette inneber at ansvarsdelinga mellom påtalemakta og politiet skal førast vidare, seier justisminister Dørum.

Politidistrikt med tilstrekkeleg bemanning og ressursgrunnlag til å kunne handtere mange og viktige samfunnsoppgåver, er ein viktig føresetnad for eit lokalt forankra politi, heiter det i meldinga. Regjeringa tek sikte på at opptaket av studentar til Politihøgskolen vil vere på eit nivå som sikrar at det er nok politifagleg personell til å dekke forventa avgang frå etaten. Nyutdanninga skal og jamne ut forskjellar mellom politidistrikta, utan at det vert føreteke reduksjonar i enkelte distrikt. Regjeringa vil i 2007, etter evalueringa av fase 2 i politireforma, komme tilbake med ei samla vurdering av behovet for tilgang på personell i eit lengre tidsperspektiv.

Politi- og lensmannsetaten tek hand om førstelinetenesta både ved oppretthaldinga av ro og orden, i den sivile rettspleia, i strafferettspleia, ved redningstilfelle og andre former for krisehandtering i lokalsamfunnet som store ulykker, naturkatastrofar og terroranslag.

– Samla betyr dette at politi- og lensmannsetaten er viktige element i den samfunnmessige beredskapen og ein viktig del av rettssamfunnet vårt, seier justisminister Dørum

Regjeringa legg særleg vekt på følgjande i utviklinga av politi- og lensmannsetaten:

Politi- og lensmannsetaten sine oppgåver: Folks tryggleik skal sikrast gjennom redusert kriminalitet, auka tilgjenge til politiet lokalt samt målretta informasjon.

Det internasjonale samarbeidet mot alvorleg, organisert og samfunnstruande kriminalitet skal styrkast. Nye Kripos, nasjonalt etterretningsregister, nye metodar og bruk av ny teknologi skal vere sentrale virkemidlar i kampen mot organisert og alvorleg kriminalitet.

Politiet skal ha det sentrale ansvaret i den lokale beredskapen med øvingsmønster basert på samvirke med andre naudetatar, Forsvaret, kommuneleiing, lokalt næringsliv, frivillige organisasjonar og publikum.

Politi- og lensmannsetaten si oppgåveløysing: Politi- og lensmannsetaten si verksemd skal vere kunnskapsstyrt. Kampen mot kriminalitet skal basere seg på førebyggjande og etterfølgjande strategiar. Førebyggjande innsats mot kvardagskriminalitet må rettast mot barn og unge, og mot gjengangarar.

Ein vil leggja til rette for at mindre alvorlege og erkjente straffbare forhold i større grad kan avgjerast umiddelbart på ein enkel måte på lokalt nivå. Utviding av ordninga med forenkla førelegg og høve for lensmenn til utferdige førelegg på bot i mindre alvorlege saker skal gjere straffesakshandsaminga enklare. Potensialet i konfliktrådsordninga skal utnyttast.

Politi- og lensmannsetaten sin kompetanse: Kompetansen som den treårige politihøgskoleutdanninga gir må nyttast der slik kompetanse er påkravd. Ei rekkje arbeidsoppgåver som i dag vert utført av politiutdanna personell, kan utførast av personell med annan relevant kompetanse under politiets leiing – til dømes transportoppdrag, arrestforvaring og passkontroll. Det er også viktig å setje saman rett kompetanse gjennom bruk av tverrfaglege team for betre oppgåveløysing.

Aktuell lenke:

• Stortingsmelding nr. 42 (2004-2005) Politiets rolle og oppgaver