Målet er å få fram nye arbeidsplassar ved å bruke råstoff frå skogbruk, jordbruk og fiskeri- og havbruksnæringa på nye og meir lønsame måtar. Ved hjelp av ny teknologi kan råstoffa brukast i staden for olje i ulike industriprodukt, som til dømes plast. Kommunal- og regionaldepartementet bidreg til at Innovasjon Noreg vil bruke om lag 20 millionar kroner i 2013 til oppstart av Bioraffineringsprogrammet.

- Noreg har gode føresetnader for å kunne hevde seg internasjonalt innan avansert foredling av fornybare råvarer. Styrken er mellom anna høg relevant kompetanse og relativ god tilgong til restråstoff og biprodukt, seier kommunal- og regionalminister Liv Signe Navarsete.

Bioraffineringsprogrammet inneheld tiltak for å utvikle ny industri innan avansert foredling av bi- og restprodukt frå skogbruk, jordbrukog fiskeri- og havbruksnæringa. Biprodukta skal utnyttast på nye vis. Dermed aukar verdien og bruken av biologiske ressursar frå primærnæringane.

Programmet inneheld støtte til utvikling av ny teknologi, ny kunnskap, oppskalering av produksjon, samt noko risikoavlasting. Dette skal kome små og mellomstore bedrifter til gode.

- Vi vil vere med og dra i gong denne satsinga. Små og mellomstore bedrifter over heile landet kan få nye vegar å gå for å auke innteninga. Alle dei involverte sektorane er svært viktige for utviklinga av næringslivet i Distrikts-Noreg, seier Navarsete.