Kommunal- og regionalminister Magnhild Meltveit Kleppa gir Trafo ved Universitetet i Agder 338 000 kroner til kunstverkstader i distrikta.

”Trass” er eit prosjekt  som skal gje kreativ ungdom i distrikta økonomisk støtte til å gjennomføre kunstverkstadar dei sjølve tar initiativ til. Ungdommane vil også få hjelp av etablerte kunstnarar gjennom ei mentorordning. Kunstverkstadane kan resultere i utstillingar, førestillingar, konsertar, utgjevingar eller andre former for markeringar lokalt. Tanken er og at prosjekta kan synast fram på nasjonale festivalar og andre arenaer.

I søknaden skriv prosjekteigarane Trafo ved Universitetet i Agder  mellom anna: ”Gjennom egeninitierte verkstad utvikler unge kunstere sine egne genuine uttrykk og egen identitet. Spontaniteten og skapergleden smitter, og initiativ som ungdom har et sterkt eierforhold til engasjerer også publikum. I distrikter med få likesinnede vil dessuten kunstverksted virke samlende og identitetsskapene for lokalsamfunnet.”

- Dette er eit flott tiltak som tar tak i kreativiteten og evnene til ungdom, seier Kleppa.

- Eg synes det er spanande at prosjekta både skal bidra til lokal identitetsbygging, og samstundes skal kunne synast fram på nasjonale arenaer slik at unge kunstnarar både får profilert seg sjølve og staden dei kjem frå, seier Kleppa.

Sidan 2006 har Kommunal- og regionaldepartementet brukt om lag 60 millionar kroner på satsinga innan kulturbasert næringsutvikling og kulturbasert stadutvikling. Departementet har blant anna støtta om lag 25 ulike pilotprosjekt. Til felles for prosjekta er at dei skal utvikle lokalsamfunna dei bur i gjennom kultur.

Til saman åtte prosjekt får hausten 2009 støtte til å drive nybrotsarbeid innan kulturbasert stadutvikling og kulturbasert næringsutvikling.
- Prosjekta vi har valt ut representerer ei nytenking som har nasjonal interesse og vesentlig overføringsverdi for andre kulturaktørar, seier statsråden.

Kommunal- og regionaldepartementet sin pressetelefon: 22 24 25 00.