Dei nye reglane for fastsetjing av grunnlaget for eigedomsskatt for anlegg for overføring og distribusjon av elektrisk vasskraft blir utsett til 2004. Det er vedteke av Kongen i statsråd i dag. Utsetjinga blei varsla i september i år, og bør gje kommunane klårare rammer for budsjettarbeidet for 2002.

Då Stortinget vedtok reforma for kraftskatt i 1996 blei det bestemt at eigedomsskatt på overføringsanlegg skal basere seg på den skattemessige verdien til driftsmidlane, medan teknisk verdi blir lagt til grunn i gjeldande system. Denne omlegginga har blitt utsett fleire gonger. I desember 2000 ble det bestemt at dei nye reglane skulle tre i kraft frå 2002.

I samband med budsjettet for 2002 blei det varsla at det er nødvendig med ytterlegare utsetjing. Arbeidet vidare med omlegging av eigedomsskatten for overføringsanlegg har framleis ikkje kome langt nok til at det let seg gjere å setje ordninga i kraft frå 2002.

Departementet ønskjer dessutan å gjere eit grundig arbeid med prinsipielle avklåringar og praktisk tilrettelegging av omlegginga. Det må leggjast vekt på at regelverket blir enkelt å handsame, med minst mogleg administrative kostnader både for likningskontora, myndigheitene og skattytarane. Effektane av dei nye reglane bør også avklårast på førehand – både på landsbasis og på kommunenivå.

Departementet tek sikte på å legge fram utkast til nye reglar slik at grunnlaget for eigedomsskatt på overføringsanlegga kan fastsetjast i samband med likninga i 2003, for bruk første gang i skatteåret 2004.