Ny nestleiar i Økokrim

I åtte år arbeidde Erling Grimstad (39) i Økokrim før han gjekk til stilling som advokat i eit velkjend firma. No vender han attende til Økokrim – som assisterande sjef.

I statsråd i dag fekk Grimstad stillinga som nestleiar ved eininga etter Einar Høgetveit, som er ny Økokrim-sjef.

Grimstad er utdanna politimann og jurist. På 1980-talet arbeidde han i politiet som etterforskar, hovudsakleg knytt til økonomisk kriminalitet. Han gjekk til Økokrim som etterforskar i 1989 og vart tre år seinare tilsett som fyrstestatsadvokat.

I 1998 gjekk han til advokatstilling i PricewaterhouseCoopers og byrja i stilling som sjefskonsulent i firmaet 1. januar 2000.