- Etter 2005 har arbeidsløysa gått markert tilbake i alle fylka, blant alle aldersgrupper og i alle bransjar. Under den raudgrøne regjeringa har rekordmange menneske kome i jobb, seier arbeids- og inkluderingsminister Bjarne Håkon Hanssen.

Noreg opplever framleis stor etterspørsel etter arbeidskraft, og utviklinga på arbeidsmarknaden er positiv. Utviklinga i utbetalingane av dagpengar ved arbeidsløyse så langt i 2008 viser ein nedgang samanlikna med same periode i 2007, noko som har samanhang med ei meir positiv utvikling på arbeidsmarknaden enn forventa etter behandlinga av statsbudsjettet for 2008. Løyvinga til dagpengar blir redusert med om lag 680 millionar kroner.

I april i år var det under 40 000 heilt ledige. Høgkonjunkturen i norsk økonomi har betra mogelegheitene til sysselsetting av langtidsarbeidslause. Arbeidsløysa blant denne gruppa av arbeidssøkjarar er meir redusert enn blant korttidsarbeidslause.

– Utviklinga syner at ein god økonomisk utvikling med høg etterspørsel etter arbeidskraft er det beste bidraget for å få inkludert nye grupper og halde utsette grupper i arbeidsmarknaden. God tilgang på arbeidskraft frå utlandet synest å forsterke nedgangen i arbeidsløysa gjennom mellom anna å motverke flaskehalsar i arbeidsmarknaden, seier statsråden.

I tillegg og etter nye anslag foreslår regjeringa å sette ned folketrygdas utgifter på alle departementsområda med om lag 900 millionar kroner. Dette kjem i hovudsak av ein forventa nedgang i utgifter til attføringspengar, stønad til einslege forsørgjarar og uføre.

Områder der utgiftene synes å bli noko høgare er rehabiliteringspengar, foreldrepengar, sjukepengar og tekniske hjelpemiddel.

 

Sjukefråver

Det totale sjukefråveret, målt som ein del av avtalte dagsverk, var om lag ein halv prosent lågare i 2007 enn i 2006. Dette inkluderer både eigenmeldt fråver og legemeldt fråver. Veksten i sjukefråveret gikk ned gjennom dei første to kvartala i 2007, men auka noko i 4. kvartal. I 4. kvartal 2007 var det samla sjukefråveret om lag ein prosent høgare enn nivået i same kvartal eit år tidlegare.

I saldert budsjett for 2008 blei det trygdefinansierte sjukefråveret, korrigert for veksten i sysselsettinga og veksten i inntektsgrunnlaget, anslått å bli på same nivå i 2008 som i 2007. Som fylgje av litt auke i sjukefråveret dei siste månadane, er anslaget for nivået på sjukefråveret oppjustert. Ein reknar no med ein auke i det trygdefinansierte sjukefråveret på ein prosent i år. Utgiftene til sjukepengar for arbeidstakarar reknar ein no med blir på 26,9 milliardar kroner i 2008. Dette er 180 millionar kroner høgare enn i saldert budsjett for 2008.

 

Kvalifiseringsprogram

Kvalifiseringsprogrammet er eit viktig virkemiddel i regjeringas innsats mot fattigdom, og er viktig i realiseringa av NAV-reforma. Formålet med kvalifiseringsprogrammet og den tilhøyrande kvalifiseringsstønaden er å bidra til at fleire i målgruppa kjem i arbeid.

– Både på fylkesnivå og lokalt nivå gjer dei ein stor innsats for å sikre en god start på og måloppnåing i kvalifiseringsprogrammet. For å oppnå betre oppfølging, gjennomføring og koordinering innanfor det enkelte fylket, foreslår regjeringa at Arbeids- og velferdsetaten blir styrka med ressursar tilsvarande ein person i kvart fylke, seier statsråden.

 

Auka  tilskottssatsar til arbeidsmarknadstiltak

Regjeringa aukar tilskottssatsane til arbeidsmarknadstiltak innan skjerma sektor (attførings- og vekstbedrifter). Samstundes opprettheld ein det totale nivået for arbeidsmarknadstiltaka.
I statsbudsjettet for 2008 auka løyvingane til arbeidsmarknadstiltak med 1,1 prosent, og tilskottssatsane til tiltak i skjerma sektor auka tilsvarande.

For å sikre kontinuitet i arbeidet med å inkludere personar som elles kan falle utanfor det ordinære arbeidslivet, aukar vi veksten i tilskottssatsane frå 1,1 prosent til 3,3 prosent. Dette tilsvarer om lag 32 millionar kroner. Beløpet blir teke innanfor den gjeldande ramma.

Løyvinga under arbeidsmarknadstiltaka gir framleis rom for eit tiltaksnivå på om lag 40 000 plassar i gjennomsnitt i 2008, eit nivå som blir vidareført i revidert nasjonalbudsjett.

 

Krigspensjon

– Arbeids- og inkluderingsdepartementet opnar for at fleire barn som under 2. verdskrigen blei direkte ramma av krigshandlingar, kan få krigspensjon. Ein føresetnad for å få krigspensjon etter den nye praksisen, er at ein har vore offer for ei direkte krigshandling som er så alvorleg at ho kan vere skuld i ein psykisk seinskade, som kan samanliknast med posttraumatisk stressliding, seier arbeids- og inkluderingsministaren.

Liberaliseringa kan blant anna få konsekvensar for barna som overlevde bombinga av Holen skule i Laksevåg hausten 1944. Alle avslagssaker som gjeld barn frå Holen skole skal ein no gå gjennom på nytt. Dei same prinsippa som no skal leggast til grunn for vurderinga av barna ved Holen skule, skal også leggast til grunn i forhold til andre barn i Noreg som var utsette for tilsvarande direkte krigshandlingar under 2. verdskrigen. Regjeringa foreslår å sette av 2,5 millionar kroner til dette.

 

AID si nettside for revidert nasjonalbudsjett 2008 

 

Lyd og bilete: