65 000 arbeidslause i januar

- Talet på arbeidslause for januar viser følgjene av den internasjonale finanskrisa. Talet viser kor viktig det er at regjeringas krisepakke no blir sett i verk, seier arbeids- og inkluderingsminister Dag Terje Andersen i ein kommentar til talet på arbeidslause frå Arbeids- og velferdsdirektoratet for januar.

-  Saman med statsbudsjettet og krisepakkene som blei lagt fram før jul,  vil regjeringas krisepakke, som blei lagt fram sist måndag, bidra til å  auke etterspurnaden i samfunnet og dempe auken i arbeidsløysa. Den siste krisepakka er særleg retta mot bygg- og anleggstenester, då dette er den næringa som er sterkast råka av nedgangskonjunkturen. I denne næringa er arbeidsløysa meir enn dobla samanlikna med januar i fjor. Det er også viktig at allereie iverksette tiltak og komande tiltak innan industrien virkar for å møte den markerte auken i arbeidsløysa, seier statsråd Dag Terje Andersen.

Nye hovudtal om arbeidsmarknaden frå Arbeids- og velferdsdirektoratet som er publisert i dag, viser at nivået på den registrerte arbeidsløysa har auka med 5 500 sesongkorrigert siste månaden. Den sesongmessige auken i arbeidsløysa er særleg sterk i januar. Når ein ikkje korrigerer for sesongen, har arbeidsløysa auka med 15 100 frå desember 2008 til januar.

Det er no registrert 65 200 heilt arbeidslause, 5 500 av desse er heilt permitterte. Den registrerte arbeidsløysa svarer til 2,6 prosent av arbeidsstyrken.

Det siste året har den registrerte arbeidsløysa auka mest for personar med erfaring frå bygg og anlegg og for menn, særleg for dei mellom 20 og 30 år.  Arbeidsløysa for personar med nedsett arbeidsevne har ikkje endra seg frå desember til januar.