E-handel for milliardar

Av fornyings- og administrasjonsminister Heidi Grande Røys (SV), Dagens Næringsliv 26. mai 2006.

Det er kanskje ikkje alltid like lett å sjå kor viktig fornyingsarbeidet i offentleg sektor er. Men nokre gonger er det enkelt. Av og til kan einskilde grep hjelpe til å spare milliardar. Eitt av dei er å få offentlege innkjøparar til å handle på same måte som stadig fleire av oss andre, nemleg gjennom elektroniske innkjøp - eller handling på Internett. Dette må offentlege verksemder no ta alvorleg.

Det offentlege handlar for ufattelege 260 milliardar kroner kvart år. Av dette går rundt 120 milliardar til produkt eller tenester som er relaterte til den daglege drifta, ein type innkjøp som er svært godt eigna for elektronisk handel. Klarer vi å redusere utgiftene med ti prosent har vi spart 12 milliardar kronar som kan brukast til andre ting! I tillegg vil òg leverandørane tene på e-handel.

Fleire forhold kan hjelpe til innsparingar, mellom anna:

• betre innkjøpsstyring og leverandøroppfølging som gir betre avtalar
• auka lojalitet til rammeavtalar som gir direkte og målbare innsparingar
• auka kvalitet i heile innkjøpsprosessen som gir betre samla ressursbruk
• meir effektive og enklare rutinar som gjer at det kan brukast mindre tid til administrasjon
• færre feil som gir reduserte kostnader

Samla vil dette kunne gi bidrag til auka konkurranse og mindre kostnader for samfunnet, samtidig som det offentlege ved å vere profesjonelle og krevjande kundar styrkjer konkurranseevna til næringslivet.

Trondheim kommune er eit glimrande døme. Dei har delteke på Markedsplassen ehandel.no. sidan starten i 2002, og kan i ein fersk rapport skilte med monalege økonomiske gevinstar. For 2006 reknar kommunen med å e-handle for rundt 175 millionar kronar. Dei har budsjettert med innsparingar på 11 millionar kronar, men erfaringane tilseier at gevinsten vil kome opp i mellom 12 og 17,6 millionar. Med ein e-handel del på 30 prosent er Trondheim blant dei leiande på elektronisk handel i Noreg i offentleg sektor.

Det gode resultatet har ikkje komme av seg sjølv. Kritiske suksessfaktorar har mellom anna vore god forankring i kommunen si toppleiing og linjeleiarar, god brukaropplæring, og klåre krav til e-handel i avtalane med leverandørane. Den viktigaste årsaka til suksess har likevel vore grepet kommunen tok frå januar 2005: Då vart det obligatorisk for alle tilsette i kommunen å handle elektronisk frå leverandørar kommunen hadde avtale med. Dette førte til ein kraftig vekst i handelen, og fleire leverandørar opplever kommunen som ein betre kunde enn nokon gong før Prisane gjekk ned med 20 til 30 prosent.

Ambisiøse mål i eNoreg 2009
Når vi ser kor tilfredse dei er som bruker e-handel i dag, kan det verke rart at utviklinga ikkje går fortare enn den faktisk gjer. Eg ser likevel ingen grunn til å senke ambisjonane, og måla for e-handel i offentleg sektor står ved lag:

• I løpet av 2007 skal alle offentlege verksemder ha målsetjingar, strategi og planar for sine innkjøp som omfattar bruk av elektroniske prosessar.
• I løpet av 2009 skal 25 prosent av offentlege driftsinnkjøp vere heilt eller delvis skaffa til vege gjennom konkurransar baserte på elektroniske prosessar.

Korleis få det til? Etter mitt syn er innkjøp og bevisst ressursbruk i det offentlege fyrst og fremst eit leiaransvar. Det er viktig at leiarar går aktivt inn for e-handel og prioriterer kompetansetiltak for dei som har hand om innkjøpsverksemda i eiga verksemd. Sjølv om vi enno ser ut til å vere eit godt stykke frå å nå dei måla som er sette t.d. i eNoreg 2009, er det fleire ting som tyder på at dette kan endre seg mykje dei neste to-tre åra. Som nemnt er fleire store og viktige aktørar no med som brukarar på ehandel.no. Dette er ei utvikling som Regjeringa ynskjer skal gå endå snøggare. Vi vil difor sjå på kva som kan gjerast for å få dette til. Mellom anna kan det vere aktuelt med auka satsing på kompetanseutvikling, organisasjonsmessige omstillingar og økonomiske insentiv.

Steg i rett retning

Fornyingsarbeidet skal gi meir velferd og mindre administrasjon. Det skal skje med utgangspunkt i brukarane sine behov og på lag med dei som skal setje fornyinga ut i live. Eg har ved fleire høve sagt at Noreg skal ha verdas beste offentlege sektor. Det krev målretta innsats, òg på innkjøpsområdet.

Min konklusjon er at vi er på rett veg, men det krevst både vilje og evne av oss alle til å endre på tilvande rutinar, arbeidsformer og innarbeidde system om vi skal lukkast. Eg er likevel trygg på at vi skal få det til. Noreg skal òg bli best i verda på e-handel i offentleg sektor.