Inngår samarbeidsavtale med Georgia

Statssekretær Espen Barth Eide underskreiv i dag ein samarbeidsavtale med Georgia. Avtala skal støtte NATOs arbeid med å bistå Georgias forsvarsreform. Sentrale element i avtala er organisasjons- og personellutvikling, støtte til forsvarsplanlegging og rådgjeving innanfor Heimevernsområdet.

Statssekretær Espen Barth Eide og viseforsvarsminister Nodar Kharshiladze.

Besøket til statssekretæren er det første politiske besøket frå Forsvarsdepartementet til Georgia nokon sinne. Han møtte Georgias forsvarsminister Bachana Akhalaia, viseforsvarsminister Nodar Kharshiladze, forsvarssjef Devi Tchankotadze, viseutanriksminister David Jalagania og leiaren for det nasjonale tryggingsrådet, Eka Tkeshelashvili.

Forsvarsminister i Georgia Bachana Akhalaia og statssekretær Espen Barth Eide.

Barth Eide møtte òg leiaren for EUs observatørstyrke i Georgia, Hansjörg Haber,  representantar for Flyktninghjelpa, Norsk Folkehjelp, den norske støttegruppa for reform på justisområdet (NORLAG), og dessutan representantar for det diplomatiske korpset.

- Utviklinga i Kaukasus generelt og Georgia spesielt gjelder Noreg direkte. Dette er ein del av NATOs nærområder. Det er viktig å støtte landet moderniseringsprosessane og den gradvise integrasjonen i det euro-atlantiske samarbeidet. Det er enno mange uløyste spørsmål i kjølvatnet av krigen mellom Georgia og Russland i august 2008. Sarkosy-Medvedjevplanen, som fekk slutt på sjølve krigen, er enno ikkje fullt oppfylt frå russisk side, framheld Barth Eide.

Noreg anerkjenner fullt ut Georgias suverenitet og territorielle integritet. Vi støttar òg initiativa den georgiske regjeringa har tatt i retning av auka samarbeid med folkesetnaden i Abkhasia og Sør-Ossetia.

Det nye forsvarssamarbeidet inngår i eit breitt norsk prosjektsamarbeid med Georgia, og omfattar òg område som støtte til internt fordrivne, reform av rettssektoren, rydding av miner og klaseammunisjon og miljø- og vannkraftsamarbeid.

Utanriksminister Vasjadze vitja Oslo i førre veke, og kunngjorde der at Georgia ynskjer å etablere ein ambassade i Oslo i nær framtid.

Statssekretær Espen Barth Eide og viseutanriksminister David Jalagania.