-Japan og Noreg er begge viktige sjømatnasjonar med eit samanfallande syn på  berekraftig bruk av sjømatressursane i havet, seier statssekretær Kristine Gramstad.

Statssekretær Gramstad møtte 11.mai seniorviseminister Tsukasa Iwamoto i Ministeriet for landbruk, skog og fiskeri under hennar besøk i Japan.

Samtalane bekrefta det gode samarbeidet mellom Noreg og Japan i Den internasjonale kvalfangstkommisjonen (IWC) og i andre internasjonale organisasjonar. Det var einigheit om å styrkje samarbeidet på fiskeriområdet.

Viktig for begge land er det å arbeide for auka konsum av sjømat, særleg blant born og unge.

Gramstad og Iwamoto var samde om at havnasjonane bør nytte RIO+20-møtet i juni til å få fram at det er viktig å sikre meir sjømat.

Gramstad viste også til nærings- og handelsminister Giske sitt besøk til Japan, kor Giske tek til orde for ein frihandelsavtale mellom Japan og Noreg med sikte på å styrkje samhandelen.

Statssekretær Gramstad vil laurdag besøkje nokre av dei områda i Japan som vart hardast råka av tsunamien i mars 2011. I desse områda står blant anna gjenoppbygginga av fiskerisektoren sentralt.