- Havbruksnæringa er ei viktig næring for Noreg, og regjeringa vil leggje til rette for vekst i havbruksnæringa, så lenge veksten er innanfor berekraftige rammer. Ettersom lusenivået i Troms og Finnmark er langt under grensa, og resistens ikkje er påvist, gjennomfører vi nå den varsla 5 % kapasitetsauken i nord, seier fiskeri- og kystminister Lisbeth Berg-Hansen som håper dette kan bidra til verdiskaping langs kysten av dei to nordlegaste fylka.

Fiskeri- og kystdepartementet fastset i dag forskrift om 5 % kapasitetsauke på løyve til oppdrett av laks, aure og regnbogeaure i Finnmark og Troms. Oppdrettarane får frist fram til 9. mai for å melde frå om auke i maksimalt tillaten biomasse (MTB) på sine løyve. 

Rammene for kapasitetsauken blei bestemt i 2010, og Stortinget behandla dei budsjettmessige konsekvensane  i samband med statsbudsjettet for 2011 (Prop. 1 S Tillegg 2). Etter det blei ei forskrift om gjennomføring av kapasitetsauken sendt på høyring, og det er denne som no blir fastsett.

Tilbodet skal offentleggjerast på fylkeskommunane og Fiskeridirektoratet sine internettsider minimum ein månad før fristutløp. Fylkeskommunane skal også seinast 14 dagar før fristutløp kunngjere tilbodet i brev til innehavarar av akvakulturløyve. Oppdrettarar som vil nytte seg av tilbodet må sende melding til fylkeskommunen kvar løyvet er heimehøyrande. Meldinga skal skje på eit fastsett skjema som vil bli utarbeidd av fylkeskommunen og Fiskeridirektoratet. Vederlaget for 5 % auke i MTB er sett til 150 000 kroner i Finnmark og 500 000 kroner i Troms. Forskrifta legg opp til at fylkeskommunen skal gjere positivt vedtak dersom søkjarane oppfyller krava som er stilt til innsending av melding og betaling av vederlag.

Kontakt: Pressevakt 22 24 66 99