NIFES leverer sjømatforsking på høgt nivå

NIFES er leiande i Noreg innan vitskapleg forsking om fiskeernæring, trygg og sunn sjømat. På enkelte område er NIFES også leiande internasjonalt.

Evalueringa av Nasjonalt institutt for ernærings- og sjømatforsking (NIFES) starta i august 2011, og evalueringsrapporten er no overlevert til Fiskeri- og kystdepartementet. Evalueringa er utført av Pöyry as og Damvad as i fellesskap.

– NIFES står for solid vitskapleg forsking, og det er heilt kritisk for å sikre trygg og sunn sjømat. Denne grundige evalueringa vil bli ein nyttig reiskap til å utvikle dette instituttet vidare, seier fiskeri- og kystminister Lisbeth Berg-Hansen.

Evalueringa konkluderer med at NIFES leverer forsking på høgt nivå. Innan fiskeernæring og trygg og sunn sjømat er instituttet leiande i Noreg, og på enkelte fagfelt er det også leiande internasjonalt.

Evalueringa viser at NIFES skårar høgt på kvalitet og relevans både frå ståstaden til brukarane og ut frå vitskaplege publikasjonar. Rapporten konkluderer med at NIFES har svært god kvalitet på den forvaltningsretta forskinga si.

Fiskeri- og kystdepartementet vil invitere dei brukarane og interessentane dette vedkjem mest til å komme med sine vurderingar av evalueringa og av dei konkrete tiltaka det blir gjort framlegg om.

–Regjeringa sin visjon er at Noreg skal vere den fremste sjømatnasjonen i verda. Då må kunnskapsmiljøa våre vere i verdsklasse. Eg vil derfor ta tak i dei utviklingspunkta som evalueringsrapporten avdekkjer, og saman med dei partane det vedkjem diskutere konkret korleis NIFES kan bli endå betre, seier Berg-Hansen. 

Les meir om saka og last ned rapporten på NIFES sine heimesider