Enklare å få fri rettshjelp, høgare valdsoffererstatning

	Regjeringa har som mål at terskelen for å be om rettshjelp skal senkast.

For å gi enno fleire tilgang til juridisk hjelp, gjer Regjeringa framlegg om å bruka 36,3 millionar til å heva inntektsgrensene for fri rettshjelp.

– Med dette framlegget oppfyller Regjeringa løftet i Soria Moria-erklæringa om å heva inntektsgrensene for fri rettshjelp. Dette er ein viktig del av regjeringa sin kamp mot fattigdom, seier justisminister Knut Storberget. Framlegget vil gjere at om lag 60 000 fleire husstandar enn i dag får krav på rettshjelp i sakstypar med inntektsgrenser. Det inneber ei auking på ca. ti prosent i talet på husstandar som fell inn under ordninga.

Dette kan mellom anna gjelde saker som samlivsbrot, barnefordeling, erstatning for personskade eller tap av forsørgjar og søknad om valdsoffererstatning.
I slike sakstypar gjeld retten til fri rettshjelp etter rettshjelpslova berre for personar med inntekt og formue under fastsette grenser.

– Regjeringa har som mål at terskelen for å be om rettshjelp skal senkast, og at juridiske problem skal løysast tidleg, seier justisministeren. Regjeringa gjer no framlegg om at inntektsgrensene i slike saker blir justerte opp frå 230 000 til 246 000 kroner for einslege og frå 345 000 til 369 000 kroner for ektefellar og andre som lever saman og har sams økonomi.

Auka bruk av konfliktråd. Regjeringa ynskjer auka bruk av konfliktråd. Konfliktråda er ein viktig del av rettspleia og tilbyr mekling og tilrettelagne møte mellom partar i konflikt. I 2009 foreslår regjeringa å auke løyvinga til konfliktråda med 6 millionar.

Betre rettshjelp. Til saman er det frå 2006-2009 løyva omlag 64 millionar til tiltak i samband med rettstryggleik og rettshjelp. Regjeringa vil gå gjennom og betre dagens rettshjelpsordning. Ei stortingsmelding om rettshjelp er planlagt lagt fram ved årsskiftet.

Høgare valdsoffererstatning. Regjeringa vil ytterlegare styrke valdsofferas stilling og vil fremje eit forslag om å auke maksimumsbeløpet for utbetaling av valdsoffererstatning frå 20 G til 40 G med verknad frå 1. juli 2009. Totalt er det frå 2006-2009 sett av om lag 90 millionar til innsats knytt til fornærma, pårørande, volds- og kriminalitetsoffer.