Noreg har vorte samd med EU om ein avtale om eit forsterka politisamarbeid, det såkalla Prüm-regelverket. Avtalen inneber at norsk politi får løyve til å søkje i EU-landas register i samband med etterforsking av alle typer kriminalsaker.


Prüm-regelverket gjer utvekslinga av informasjon mellom politiet i EUs medlemsland enklare. Norsk politi vil no kunne søke direkte i EUs register for DNA-profilar, fingeravtrykk og køyretøyopplysningar.

– Prüm må sjåast som ein liten revolusjon når det gjeld politiarbeid, seier justisminister Knut Storberget.

– Når Prüm-avtalen tek til å gjelde, vil den gjere den internasjonale etterforskinga meir effektiv og setje oss betre i stand til å oppklare brotsverk – både den organiserte grensekryssande kriminaliteten og alvorlege brotsverk med utanlandske gjerningsmenn.

– Til dømes kan ein utanlandsk tjuvebande som kjem på eit kort raid i Norge, framleis fangast etter at dei er forsvunne ut av landet, så fremt dei legg att DNA-spor eller fingeravtrykk. Får vi treff på spora i Prüm-registeret, kan vi få fleire opplysningar om gjerningsmennene gjennom det ordinære politisamarbeidet vi har med EU, seier Storberget.