Utviklingsminister Heikki Holmås og kunnskapsminister Kristin Halvorsen besøker Tanzania saman med ei skuleklasse frå Bergen 19.-21. mars. På programmet står samarbeid om energi, høgare utdanning og forsking.

Dei to statsrådane vil i hovudsak ha felles program i Tanzania. Dei vil saman besøke landbruksuniversitetet Sokoine i byen Morogoro utanfor Dar es Salaam. Noreg har støtta universitetet lenge. Samarbeid om høgare utdanning og forsking knyta til landbruk, skog og klima er sentralt. Meir enn 8 av 10 arbeidsplasser i Tanzania er knytta til landbruket, som vil få endra kår når dei farlege klimaendringane blir endå meir merkbare. Meir kunnskap og forsking vil vere avgjerande for å produsere nok mat i framtida.

Kunnskapsministeren byrjar besøket på Universitetet i Dar es Salaam, som blir støtta av Noreg og har eit samarbeid med Universitetet i Oslo. Ho møter òg utdanningsministeren i Tanzania.

For Holmås byrjar besøket med globalt og lokalt energisamarbeid på programmet. Noreg, Tanzania og Mexico står i spissen for arbeidet med å meisle ut nye energimål for verda i ein prosess som leies av FN. I Dar es Salaam legg ein til rette for brei dialog om energi og utvikling der synspunkt frå styresmakter, sivilt samfunn og næringsliv skal høyrast. I Tanzania har mindre enn 15 prosent av folket elektrisitet. Store gassfunn utanfor kysten av Tanzania skapar ny optimisme i landet. Samstundes er det frykt for at rikdomen ikkje skal kome heile folket til gode. Energi er av dei viktigaste tosidige samarbeidsområda mellom Noreg og Tanzania.

Holmås og Halvorsen vil òg ha møter med styresmakter, opposisjonspolitikarar, FN, sivilt samfunn, religiøse leiarar, korrupsjonsjegarar og næringsliv under besøket.

Skuleklassen frå Langhaugen vidaregåande skule i Bergen vann NM i bistand i fjor haust. Reisa til Tanzania er premien. Dei vil følgje Holmås og Halvorsen på feltbesøk til landbruksuniversitetet, og ta del i samtalene om energi saman med unge frå Tanzania. Dei vil òg besøke den internasjonale domstolen for Rwanda, og ulike prosjekt som viser samarbeidet mellom Tanzania og Noreg.