Historisk arkiv

5600 fleire studieplassar og 1000 nye studentbustader

Historisk arkiv

Publisert under: Regjeringen Stoltenberg II

Utgjevar: Kunnskapsdepartementet

Regjeringa vidarefører satsinga på nye studieplassar og studentbustader i statsbudsjettet for 2010. I tillegg blir lærarutdanningane styrkte, og det blir stimulert til samarbeid mellom institusjonane.

Regjeringa vidarefører satsinga på nye studieplassar og studentbustader i statsbudsjettet for 2010. I tillegg blir lærarutdanningane styrkte, og det blir stimulert til samarbeid mellom institusjonane. – Gjennom dette budsjettet viser regjeringa vilje til å prioritere studentvelferd, kvalitet og auka kapasitet i høgare utdanning. Det gjer oss betre førebudde på framtida, seier statsråd for forsking og høgare utdanning, Tora Aasland.

Lenke til orientering til universiteter og høyskoler om statsbudsjettet 2010 (Heftet er oppdatert 15.10.09)

Utdanningsbølgja

For å møte behovet for auka kompetanse og sikre kapasitet og fleksibilitet ved universitet og høgskular blir det foreslått å løyve 291,2 millionar kroner i 2010 knytt til dei 3000 studieplassane som blei tildelte i samband med revidert nasjonalbudsjett 2009. I tillegg blir det oppretta om lag 2600 nye studieplassar. Det inneber at det til saman blir 5600 fleire studieplassar i 2010. Regjeringa vil òg vidareføre studieplassar i etter- og vidareutdanning, desentralisert utdanning og fagskuleplassar frå revidert nasjonalbudsjett 2009.

– Søkinga til høgare utdanning har auka kraftig i 2009, og regjeringa følgjer no opp det med løyvingar til fleire studieplassar. Noreg har behov for fleire unge med høgare utdanning, og det er spesielt viktig i ein periode med ein vanskelegare arbeidsmarknad for unge under 30 år, seier Tora Aasland.

Tilskot til 1000 nye studentbustader

Regjeringa sitt budsjettforslag for 2010 legg opp til å gi midlar til 1000 nye studentbustader. – Vi veit at studentane bruker ein stor del av pengane sine på å bu, og derfor er studentbustader viktige for at alle skal ha ein reell lik rett til utdanning. Med denne satsinga held vi framleis trykket oppe på studentbustadbygginga, seier Aasland.

Lærarutdanning

Lærarutdanninga kjem til å gå gjennom store endringar dei nærmaste åra.  Allmennlærarutdanninga blir nå lagd om til ei ny trinndelt grunnskulelærarutdanning, høvesvis for barne- og ungdomstrinnet. Til dette arbeidet er det i 2009 sett av 20 millionar kroner for å stimulere til samarbeid og 80 millionar kroner til kvalitetsutvikling på utdanningsområdet. Regjeringa foreslår å vidareføre ei løyving på om lag 100 millionar kroner i 2010 til forbetringstiltak i lærarutdanninga.

Samarbeid, arbeidsdeling og konsentrasjon

Regjeringa meiner det må bli ei klarare arbeids­deling og meir forpliktande fagleg samarbeid i universitets- og høgskulesektoren. Regjeringa foreslår derfor at det blir løyvd 50 millionar kroner i 2010 for å styrkje samarbeids- og fusjonsprosessar som bidreg til å konsentrere ressursinnsatsen og utvikle sterkare forskingsmiljø og meir robuste utdanningar. Målet med desse strategiske midlane er å bidra til ei betre arbeidsdeling mellom institusjonane, auka fagleg konsentrasjon og større grad av samarbeid, slik at institusjonane blir betre i stand til å nå måla sine.

Styrkje studiefinansiering 

Regjeringa foreslår å auke alle satsar i utdanningsstøtteordningane med 1,6 prosent for undervisningsåret 2010–11. Det inneber at basisstøtta til studentar i høgare utdanning stig frå 87 600 kroner i undervisningsåret 2009–10 til 89 000 kroner i undervisningsåret 2010–11.

Regjeringa ønskjer meir mobilitet blant norske studentar og auka internasjonalisering av grunnopplæringa, og foreslår fleire tiltak for å redusere barrierane for å ta utdanning i utlandet. Til dømes blir det foreslått å ta bort kravet om at utdanninga og lærestaden må vere godkjende i studielandet, så lenge NOKUT (Nasjonalt organ for kvalitet i utdanninga) eller ein norsk lærestad har godkjent utdanninga. Regjeringa foreslår vidare å løyve 7,5 millionar kroner til ei ny ordning der kvotestudentane får utbetalt eit startstipend tilsvarande basisstøtte i to månader når dei kjem til lærestaden i Noreg. Vidare foreslår regjeringa tiltak for å leggje betre til rette for nye kvotestudentar som kjem til Noreg.

I 2009 blei det innført ei ordning med avskriving av utdanningsgjeld for låntakarar som fullførte visse lærarutdanningar innanfor realfag eller språk. Ordninga blir no foreslått utvida med utdanningar i samiske språk for å stimulere fleire til å ta samisk lærarutdanning eller få kompetanse i samisk som del av lærarutdanninga. 

Trafikkflygarutdanning

Regjeringa foreslår å etablere ei offentlig finansiert trafikkflygarutdanning (bachelor i luftfart) ved Universitetet i Tromsø. Det vil bidra til å dekkje eit viktig nasjonalt utdanningsbehov. Regjeringa foreslår å løyve 13,5 millionar kroner til det i 2010. I tillegg vil Universitetet i Tromsø bidra med 2,4 millionar kroner.