Regjeringa vil at vaksne som ønskjer og har behov for meir opplæring i grunnleggjande ferdigheiter som lesing, skriving, rekning og IKT-bruk, skal få det. Gjennom Program for basiskompetanse i arbeidslivet (BKA) blir det foreslått å løyve 79,8 millionar kroner til dette formålet. 

I budsjettet for 2009 blei det opphavleg løyvd 38,6 millionar kroner til dette formålet, men gjennom regjeringa sin krisepakke i januar og det reviderte budsjettet i mai blei innsatsen dobla til 78,5 millionar kroner. Dette høge nivået skal vidareførast og prisjusterast for 2010. 

- Programmet for basiskompetanse i arbeidslivet legg opp til at opplæringa kan skje ute på arbeidsplassen til den enkelte, og har blitt møtt med stor interesse frå bedriftene. Høgare basiskompetanse er viktig både for den enkelte arbeidstakaren og for næringslivet samla, seier kunnskapsminister Bård Vegar Solhjell.

Regjeringa ønskjer samtidig at satsinga på BKA skal bli eit tilbod til fleire grupper. Det kan vere arbeidstakarar i utsette bransjar, arbeidsledige gjennom eit styrkt samarbeid med NAV, og deltakarar gjennom eit styrkt samarbeid med studieforbund.

Regjeringa har òg sett av inntil 7 millionar kroner for å sikre at utvalde fylkeskommunar skal utvikle fleksible opplæringstilbod som gjer det mogleg for arbeidsledige å kunne fullføre og formalisere kompetansen sin, også etter at dei er komne tilbake i jobb. Dette tiltaket er i samsvar med det som blei varsla i stortingsmelding nr. 44 (2008–2009) Utdanningslinja. 

Nytt kunnskapssenter for utdanning frå 2011

Det er eit mål at utviklinga av utdanningssystemet skal byggje på kunnskap om kva som verkar best. I dag finst det inga samla oversikt over dei mest sentrale resultata frå utdanningsforskinga, mens fleire undersøkingar viser at sektoren og forskingsmiljø etterspør nettopp det. 

Regjeringa foreslår derfor å etablere eit kunnskapssenter for utdanning frå 1. januar 2011. Noregs forskingsråd får i oppgåve å etablere senteret, og det blir sett av 2 millionar kroner frå 2010 for å førebu opprettinga. Kunnskapssenteret skal samanstille og formidle resultat frå norsk og internasjonal utdanningsforsking. Det vil òg vere ei oppgåve for senteret å identifisere hòl i kunnskapsgrunnlaget og kommunisere behovet for ny forsking til Noregs forskingsråd, forskingsmiljøa og den sentrale utdanningsadministrasjonen.