Kultur- og kyrkjedepartementet foreslår at bank- og finansinstitusjonar som er etablerte i Noreg, og filialar av utanlandske betalingsføretak her, skal påleggjast plikt til å hindre betaling til pengespel utan norsk godkjenning.

Departementet foreslår også at forbodet skal gjelde betaling i pengespel som kan identifiserast etter brukarstadkodesystemet som vert nytta ved betaling med debet- og kredittkort. Forslaget går også ut på at Lotteritilsynet skal kunne gi pålegg om å sperre andre typar av betalingsoverføring til og frå pengespelselskap som ikkje har løyve til å tilby pengespel i Noreg.

Dette kjem fram i eit utkast til forskrift om forbod mot betalingsformidling i pengespel utan norsk godkjenning som vert sendt på høyring i dag. Høyringsfristen er 1. juli 2009.

Stortinget vedtok før jul ei lov om forbod mot betalingsformidling for pengespel utan norsk løyve. Lova vil tre i kraft samtidig med forskrifta som fastset kva for betalingsinstitusjonar og -former som vert omfatta av forbodet.

Forskriftsforslaget vert også meldt til EFTAs overvakingsorgan i tråd med EØS-høyringslova. Denne meldingsordninga gir andre EFTA- og EU-land, EU-kommisjonen og EFTAs overvakingsorgan høve til å fremje synspunkt på forslaget.

Lenkje til høyringssaka