Tilskot til Sjakk-OL i Tromsø

Regjeringa ønsker å løyve 70 millionar kroner til sjakk-OL i Tromsø. Det offentleggjorde kulturminister Anniken Huitfeldt i dag.

- Sjakk er ein stor idrett, og regjeringa ønsker å gje tilskot til søknaden om å få arrangere meisterskapen i Noreg. Det er flott at Norges Sjakkforbund valde Tromsø som  søkjarby. Der har det vore eit stort lokalt engasjement for å få dette på plass, seier Anniken Huitfeldt.

Det er selskapet Sjakk Tromsø AS, eigd av Tromsø kommune (90 %) og Noregs Sjakkforbund (10 %), som har søkt staten om støtte. Om Noreg og Tromsø får arrangere meisterskapen blir avgjort under sjakk-OL 2010 i Khanty-Mansyisk i Russland.

Arrangementet går over to veker, med om lag 1400 spelarar. I tillegg kjem Det internasjonale sjakkforbundets kongress med om lag 200 deltakarar.