Måndag 27. mai møter representantar for regjeringa brukar- og interesseorganisasjonar for å få innspel til ny nasjonal strategi for bustadsosialt arbeid.

– Verken staten eller kommunane kan løyse dei bustadsosiale utfordringane aleine. Me treng fleire med på laget. Ikkje minst treng me erfaringane og innspela frå brukar- og interesseorganisasjonar, seier kommunal- og regionalminister Liv Signe Navarsete.

Regjeringa varsla i bustadmeldinga ”Byggje-bu-leve” at ho vil intensivere innsatsen overfor dei som slit på bustadmarknaden. Gjennom den nye strategien ynskjer regjeringa å målrette den tverrfaglege innsatsen. På møtet i kontaktutvalet for sosialt og økonomisk vanskelegstilte møter politisk leiing frå Arbeidsdepartementet og Kommunal- og regionaldepartementet Samarbeidsforum mot fattigdom i Noreg.

– Eg ynskjer dialog om korleis me kan omsetje ord til handling. Korleis kan fleire få hjelp til ein eigna stad å bu og hjelp til å bli buande? Eg gler meg til å høyre meir om innspela til Samarbeidsforum mot fattigdom, seier Navarsete.

Desse møter i kontaktutvalet for sosialt og økonomisk vanskelegstilte:

  • Rusmisbrukernes interesseorganisasjon (RIO)
  • Bikuben – regionalt brukerstyrt senter i Nord-Norge
  • Leieboerforeningen
  • Likestilling, inkludering og nettverk (LIN)
  • Velferdsalliansen
  • Stiftelsen rettferd for taperne
  • Kreativt og mangfoldig arbeidsliv (KREM)
  • Batteriet