Eit meir rettferdig inntektssystem for kommunane

– Min ambisjon er å utjamne forskjellar mellom kommunane. Slik kan vi sikre at kommunane tilbyr likeverdige tenester i heile Noreg, seier kommunal- og regionalminister Magnhild Meltveit Kleppa. I dag fekk ho forslaga frå det politiske utvalet som har sett på endringar i inntektssystemet.

Det er inntektssystemet som ligg til grunn for fordelinga av rammetilskotet til kommunane og for omfordeling av skatteinntektene. I 2008 vert 187 milliardar kroner fordelt gjennom dette systemet. Sørheimutvalet har vurdert deler av inntektssystemet i rapporten ”Forslag til forbedring av overføringssystemet for kommunene”.

- Dette er eit verdifullt innspel i regjeringa sitt vidare arbeid for å leggje fram eit nytt heilskapleg inntektssystem for kommunane, seier Magnhild Meltveit Kleppa.

Rapporten skal no ut på ei brei høyring der alle kommunar kan kome med innspel. Fristen er 28. januar 2008. Deretter skal regjeringa vurdere endringar.
Blant Sørheimutvalet sine forslag er:

• Auka inntektsutjamning 
• Eit nytt distriktspolitisk tilskot 
• Ein vekstkompensasjon 
• Eit nytt teljetidspunkt for innbyggjartal og -samansetjing
• Eit nytt inntektsgarantitilskot til erstatning for dagens overgangsordning
• Eit redusert skjønnstilskot

- Eg er nøgd med at det på fleire punkt er politisk semje i utvalet. Eg har også merka meg at eit fleirtal ønskjer ei auka utjamning av skatteinntektene til kommunane, seier statsråden.

- Regjeringa har gitt kommunane ein vekst i inntektene på 21 milliardar kroner frå 2005 til 2008. No skal vi sjå nærare på fordelinga av desse inntektene. Norske kommunar skal ha eit reelt høve til å gje innbyggjarane sine gode velferdstenester, seier Kleppa.

Sørheimutvalet vart oppnemnt i desember 2006, og har vorte leia av Kristin Sørheim frå Senterpartiet. Utvalet er eit politisk utval, med medlemmar frå alle dei politiske partia med representasjon på Stortinget. Bakgrunnen for at utvalet vart nedsett var at regjeringa ynskja ein gjennomgang av dei politiske elementa i inntektssystemet., inkludert dei elementa som Borgeutvalet ikkje foreslo endringar på.

Utvalet sitt forslag vil verte vurdert  saman med forslag til nye kostnadsnøklar for kommunane. Etter planen vert eit samla nytt inntektssystemet for kommunane presentert i kommuneproposisjonen våren 2008.

• Sørheimutvalet sin rapport
• Tabell-vedleggene i Excel-format
• Kva er inntektssystemet?
• Ofte stilte spørsmål
• Presentasjonen til Sørheimutvalet på pressekonferansen 26.10.2007 (pdf)
• Opptak av pressekonferansen 26.10.2007 på regjeringen.no Nett-TV
• Lydopptak av pressekonferansen 26.10.2007 (mp3)
• Høring - Sørheimutvalget - Inntektssystemet for kommunene

Kommunal- og regionaldepartementet sin pressetelefon: 22 24 25 00.