Kleppa set fortgang i regelverkrydding

- No set vi fortgang i arbeidet med å sjå på alt relevant regelverk i samband med Terra-saka, varslar kommunal- og regionalminister Magnhild Meltveit Kleppa.

- Mitt ansvar er å sikra at regelverket er godt. Eg har teke initiativ til eit møte med fylkesmennene 28. januar for å oppsummera og læra av det som har hendt. I etterkant vil eg vurdera å stramma inn regelverket for å hindra at denne type saker skal kunna skje på nytt, seier Kleppa som også allereie før jul bad lovavdelinga i Justisdepartementet om bistand i dette arbeidet.

Fylkesmennene i fire fylke har no konkludert med at dei åtte kommunane som har gått inn i finansielle avtaler med Terra Securities, har brote kommunelova. I dag slo fylkesmennene i Vest-Agder, Rogaland og Nordland fast at Kvinesdal, Haugesund, Rana, Narvik, Hattfjelldal og Hemnes kommunar har brote kommunelova på fleire punkt i samband med investeringane via Terra Securities. Frå før har Fylkesmannen i Sogn og Fjordane kome til same konklusjon for Vik og Bremanger.

- Eg ser sjølvsagt alvorleg på at kommunane har brote lova og tatt for stor risiko med innbyggjarane sine pengar. Eg skjønar kommunane er i ein vanskelig situasjon, men no ventar eg at dei ryddar opp, seier statsråden.

Konsekvensen av fylkesmennene sine vedtak er at kommunane må selja seg ut av investeringane. Kleppa vil ikkje setja ein frist for når det må skje.
 
- Eg trur kommunane har lært, og eg vil ikkje bidra til å straffa dei hardare. No er det viktig at kommunane saman med sine rådgjevarar får tid til å leggja opp ein god prosess som sikrar verdiane til kommunane best mogleg, seier Kleppa.

Fylkesmannen i Nordland si vurdering

Fylkesmannen i Rogaland si vurdering

Fylkesmannen i Vest-Agder si vurdering

Fylkesmannen i Sogn og Fjordane si vurdering.

Kommunal- og regionaldepartementet sin pressetelefon: 22 24 25 00.