Norske designarar vert inviterte til å foreslå korleis vallokala og valutstyr skal sjå ut i framtida. – Eg har stor tru på at konkurransen gir spanande og kreative løysingar til beste for veljarane, seier kommunal- og regionalminister Magnhild Meltveit Kleppa.

Statens designkonkurranse 2008, "Design og demokrati", vert gjennomført i løpet av sommaren og hausten. Norsk Form står bak konkurransen som Kommunal- og regionaldepartementet har løyvd 425 000 kroner til. Offentleggjering og premiering av vinnarløysinga skjer den 9. oktober i samband med ei utstilling av dei forslaga som vert innleverte til konkurransen.

– Det er spanande at norsk design kan medverke til gode løysingar for røystegjeving, seier Magnhild Meltveit Kleppa. – Eg håpar at konkurransen fører til gode funksjonelle løysingar som dekkjer behova for informasjon, tilgjenge og utstyr i vallokala for både kommunane og veljarane.

Målet med konkurransen er å utvikla heilskaplege, funksjonelle og tiltalande fysiske rammer rundt røystegjevinga. Det er viktig at alle veljarane, uansett funksjonsnivå, opplever at vallokala er tilgjengelege, attkjennande og attraktive. Konkurransen skal resultera i enkle og funksjonelle løysingar for kommunane for informasjon, logistikk, produksjon, montering og vedlikehald av mellom anna avlukke og valurner.

Vinnarløysinga skal prøvast ut i nokre pilotkommunar ved valet i 2009. Dersom løysinga viser seg å fungera godt, kan det vera aktuelt å gje alle kommunane tilbod om å bruka heile eller delar av løysinga ved framtidige val.

Kommunal- og regionaldepartementet sin pressetelefon: 22 24 25 00.