Forvaltningsreforma på høyring

Høyringsnotatet om gjennomføring av forvaltningsreforma er klart.

- Fylkeskommunane blir no den viktigaste offentlege aktøren for verdiskaping og etablering av arbeidsplassar i dei ulike landsdelane, seier kommunal- og regionalminister Magnhild Meltveit Kleppa.

Kommunal- og regionaldepartementet har ansvaret for å koordinera arbeidet med gjennomføring av forvaltningsreforma.

- Eg er nøgd med at vi no har fått ei avklaring på det nærmare innhaldet i dei oppgåvene som skal overførast til folkevalde regionalt, seier Kleppa.

Dei oppgåvene som er konkretisert og omtalt i høyringsnotatet, er ei oppfølging av stortingsmeldinga ”Regionale fortrinn – regional framtid” frå desember 2006 og Stortinget si handsaming av denne.

Det blir mellom anna overført store oppgåver innan samferdsel når fylkeskommunane frå 2010 blir ansvarlege for riksvegane utanom stamvegane. Andre viktige oppgåver for ei meir samordna regional utvikling er oppretting av regionale forskingsfond og ei regionalisering av eigarskapen til Innovasjon Noreg.

Ut frå dei innspela som er hittil er komne frå fylkeskommunane om regional inndeling, ser ikkje kommunal- og regionalministeren det aktuelt for regjeringa å gjera framlegg om endra grenser.

- Eg ser likevel fram til nye innspel om dette frå dei nye fylkestinga, slik at vi eventuelt kan få friviljuge samanslåingar, seier kommunal- og regionalministeren.

Høyringsfristen er 30. april. Departementet tek sikte på å fremja ein samla proposisjon til Stortinget om oppgåver og eventuelle inndelingsendringar hausten 2008.

Regjeringa føreset at overføring av oppgåver og eventuelle endra grenser vert iverksett frå 1. januar 2010.

• Høyring - Forvaltningsreforma
• Forvaltningsreform (temaside).

Kommunal- og regionaldepartementet sin pressetelefon: 22 24 25 00.