Fleire vidaregåande skular får midlar til føraropplæring
Historisk arkiv
Publisert under: Regjeringen Stoltenberg II
Utgjevar: Kommunal- og regionaldepartementet
Pressemelding | Dato: 22.06.2011
Sør-Trøndelag fylkeskommune får 200 000 kroner til å gjennomføre prøveprosjekt med føraropplæring ved Rissa, Meldal, Hitra og Gauldal vidaregåande skuler.
Sør-Trøndelag fylkeskommune får 200 000 kroner til å gjennomføre prøveprosjekt med føraropplæring ved Rissa, Meldal, Hitra og Gauldal vidaregåande skuler.
Kommunal- og regionaldepartementet vidareførar prøveordninga med føraropplæring i vidaregåande skular med stor avstand til køyreskule. I år får heile 18 skular tilskot frå departementet for å gjennomføre undervisninga. I fjor fekk 13 skular støtte. Resultata frå prøveordninga har vore gode.
- Mellom anna har me sett at strykprosenten til førarprøva har blitt lågare, og at fråveret og kostnadene i samband med reise til køyretimar har gått ned, seier kommunal- og regionalminister Liv Signe Navarsete.
Prosjektet har fleire mål, mellom anna å gjere trafikkopplæring for distriktsungdom meir tilgjengeleg for elevane og redusere fråveret i den vidaregåande skulen. Store avstandar skapar utfordringar for mange unge i Distrikts-Noreg som vil ta førarkort. Føraropplæringa på dei vidaregåande skulane gjer at ungdomane kan spare tid og pengar på reising til køyreskular.
- Unge er ei viktig målgruppe i distrikts- og regionalpolitikken, og styrking av tilbodet til føraropplæring er eit av fleire bidrag for å gje ungdom i distrikta betre vilkår, seier statsråd Navarsete.
No i 2011 har ni fylkeskommunar søkt Kommunal- og regionaldepartementet om støtte til å gjennomføre prøveprosjekt. Talet på elevar på kvar skule som får nytte tilbodet varierer frå 30 til 150. Skulane må inngå samarbeid med ein køyreskule, som står for undervisninga.
Prøveordninga starta i 2007-2009 då seks skular gjennomførte tilsvarande prøveprosjekt, som ein del av regjeringa si satsing på trafikktryggleik og ungdomstiltak i distrikta. I 2010 kunne fylkeskommunane søkje til departementet om pengar til fleire prøveprosjekt, og 13 skular i 8 fylkeskommunar fekk tildelt midlar. No fører 9 skular prosjektet sitt vidare, og ytterlegare 9 skular startar opp nye prosjekt for sine elevar.
Liste over skulane som får støtte til føraropplæring ved vidaregåande skule i 2011:
- Nordland: Knut Hamsund vgs og Mosjøen vgs
- Nord-Trøndelag: Grong vgs
- Sør-Trøndelag: Rissa vgs, Meldal vgs, Hitra vgs og Gauldal vgs
- Sogn og Fjordane: Dale vgs
- Hordaland: Fitjar vgs og Austevoll vgs
- Rogaland: Ølen vgs og Ryggjabø vgs
- Aust-Agder: Tvedestrand og Åmli vgs, Risør vgs og Setesdal vgs
- Buskerud: Numedal vgs
- Hedmark: Trysil vgs og Midt-Østerdal vgs
Kommunal- og regionaldepartementet sin pressetelefon: 22 24 25 00.