15 butikkar i Distrikts-Noreg har fått tilsagn om tilskot til etablering eller oppgradering av drivstoffanlegg.

Kommunal- og regionaldepartementet innførte 10. januar ei heilt ny tilskotsordning for å sikre tilgangen på drivstoff i distrikta, etter at det kom rapportar om at fleire lokalsamfunn i praksis var utan tilgang på bensin og diesel i rimeleg nærleik. Regjeringa har i år sett av vel 21 millionar kroner til dette formålet.

- Gode grunnleggjande tenester i alle deler av landet er ei viktig målsetting i distrikts- og regionalpolitikken. Sal av drivstoff har for mange distriktsbutikkar vore ein viktig tilleggsfunksjon. Daglegvarehandel og drivstoffhandel er tenester som byggjer opp om kvarandre, og som saman byggjer opp sterkare lokale servicesentra. Eg synest det er svært spennande å sjå så konkrete resultat, og at det samla tenestetilbodet i distrikta blir betre, seier statsråd Liv Signe Navarsete.

Fram til 1. mai var det gjeve tilsagn om utbetaling av til saman 3,38 millionar kroner, fordelt på 15 butikkar. Dette går fram av eit oversyn frå Merkur-programmet.  Dei forvaltar ordninga  på vegne av departementet.

Fire av butikkane som no satsar på drivstoffanlegg, ligg i Nordland, der det er utbetalt til saman 1,35 millionar kroner. I Sogn og Fjordane er det to butikkar som har fått tilskot til drivstoffanlegg. Resten av tilskota er fordelt på ni andre fylke.

Kvar butikk kan få opptil 500 000 kroner i tilskot. Investeringsstøtta til drivstoffanlegg skal i hovudsak gå til opprusting av eksisterande anlegg. Butikkar kan og søke om nye anlegg om det er aktuelt. Anlegg lokalisert til Merkur-butikkar og stader der avstandane til næraste drivstofftilbod er lange, skal prioriterast.

Kommunal- og regionaldepartementet sin pressetelefon: 22 24 25 00.