Gildeskål er ein av 12 kommunar som får å ta del i den nye treårige satsinga ”Bustadetablering i distrikta”. 

- Det har vore krevjande  å plukke ut dei beste av 82 søknadar. At heile 82 kommunar søkte om å ta del i satsinga syner at ”Bustadetablering i distrikta”  både er eit attraktiv og viktig tiltak, seier kommunal- og regionalminister Liv Signe Navarsete.

”Bustadetablering i distrikta” er ei treårig satsing. I 2012 er det sett av 20 millionar kronar til satsinga. Husbanken har ansvar for koordinering. 

- Målet er å auke bustadtilbodet i distrikta. Nokre stader er bustadmarknadene små og usikre. Andre plassar manglar det bustader. Kommunar kan ha arbeidsplassar, men ikkje bustader til tilflyttarar. Tilskot til bustadetablering vil gjere det lettare å rekruttere kompetanse til slike kommunar, seier Navarsete.

Gildeskål kommune har dei siste ti år hatt ei svak utvikling i folketalet. Det skuldast mellom anna få bustader. Det manglar private utleigebustader til arbeidsinnvandrarar, pendlarar og unge som skal etablere seg. 

Kommunen har no planar om å byggje om ein gammal skule til leilegheiter for eldre. Det kan frigjere einebustader for familiar i etableringsfasen. Gildeskål kommune presenterer fleire tiltak som andre kommunar kan lære av. Det gjeld særleg modellar for samarbeid med private aktørar.


Kommunal- og regionaldepartementet sin pressetelefon: 22 24 25 00