Stiftinga Antidoping Norge blir tildelt 22,6 millionar kroner av spelemidla til idrettsformål i 2011. Dette er ein auke på ein halv million kroner i forhold til 2010.

- Eg er stolt over at Noreg, med Antidoping Norge i spissen, er eit førebilete for andre når det gjeld antidopingarbeid. I Antidoping Norge går utdannings- og verdiarbeidet hand i hand med kontroll- og avskrekkingsarbeidet på ein god måte, seier kulturminister Anniken Huitfeldt.  

- Kampen mot doping innanfor idretten krev stadig utvikling av nye kontrollmetodar.  I tillegg er det ønskjeleg med eit stort førebyggjande og haldningsskapande arbeid.

- Arbeidet i Antidoping Norge skal skje i samarbeid med nasjonale og internasjonale idrettsorganisasjonar, World Anti-Doping Agency og andre organisasjonar som driv med antidopingarbeid, seier kulturministeren. – Eg legg til grunn at alle organisasjonsledd innanfor norsk idrett ivrar for godt antidopingarbeid, understrekar Huitfeldt.