Stiftinga Antidoping Norge vert tildelt 23,6 millionar kroner av spelemidlane til idrettsformål i 2013. Dette er ein auke på ein million kroner samanlikna med 2012.

- Eg er stolt over at Noreg, med Antidoping Norge i spissen, er eit førebilete for andre når det gjeld antidopingarbeid, seier kulturminister Hadia Tajik. Med tilskotet frå spelemidlane bidreg me til å utvikla Antidoping Norge som eit uavhengig kontroll- og påtaleorgan slik at arbeidet med å fremja ein ærleg og dopingfri idrett kan halda fram, seier kulturminister Tajik.

- Hendingane den siste tida har vist at dersom me skal sikra ein idrett fri for doping, må dopingjegarane heile tida utvikla metodane og verksemda si. - Ein auke i tilskotet gjev grunnlag for at Antidoping Norge kan halda fram med eit omfattande, kvalitativt godt antidopingarbeid, seier kulturministeren.

- Arbeidet i Antidoping Norge skal skje i samarbeid med nasjonale og internasjonale idrettsorganisasjonar, World Anti-Doping Agency og andre organisasjonar som driv med antidopingarbeid, seier kulturministeren. - Eg legg til grunn at alle aktørar innanfor norsk idrett ivrar for ein rein idrett og eit godt antidopingarbeid, understrekar kulturminister Tajik.