Kulturdepartementet, Norges idrettsforbund og olympiske og paralympiske komité (NIF) og Lillehammer kommune har i dag stifta aksjeselskapet Lillehammer Ungdoms-OLs Organisasjonskomité (forkorta LYOGOC) for å planleggje, førebu og gjennomføre ungdoms-OL 2016. Stiftarane av selskapet er Kulturdepartementet, NIF og Lillehammer kommune, som eig respektive 51 %, 24,5 % og 24,5 % av aksjane. Selskapet skal ha kontor i Lillehammer.

Styret i selskapet er oppnemnt tidlegare og består av følgjande personar:  

Styreleiar Siri Hatlen (54), styremedlem i fleire norske selskap og tidl. adm. dir. Oslo Universitetssjukehus

Styremedlem Inge Andersen (47), generalsekretær NIF
Styremedlem Synnøve Brenden (52), politisk rådgjevar i Stortinget og tidl. ordførar Lillehammer
Styremedlem Bjørn Brenna (55), økonomidirektør i REC og tidl. økonomidirektør LOOC
Styremedlem Lotte Bråthen (23), student Høgskolen i Lillehammer Styremedlem Gerhard Heiberg (72), norsk medlem av IOC
Styremedlem Mari Rosenvinge Nygaard (46), HR-direktør i A-pressen og leiar for frivilligarbeidet i Ski-VM 2011
Styremedlem Siren Sundby (29), konsulent i Capgemeni Consulting og OL-, VM- og EM-meister i segling

Den internasjonale olympiske komité (IOC) tildelte Ungdoms-OL 2016 til Norges idrettsforbund og olympiske og paralympiske komité (NIF) og Lillehammer kommune i desember 2011. Dei II olympiske vinterleikar for ungdom skal arrangerast i Lillehammer, Gjøvik, Hamar og Øyer.

Stortinget har gitt Ungdoms-OL tilsegn om eit tilskot på 232 millionar kroner. Styret er i gang med å søkje etter dagleg leiar og nøkkelpersonar i selskapet.