Kulturministeren ynskjer innspel til raudliste

- Me skal ta vare på vår kulturelle arv, både den materielle og immaterielle. Me har god oversikt over tradisjonelle handverk som står i fare for å gå tapt, men me treng ei betre og samla oversikt over den immatrielle kulturarven. Ei slik kartlegging er viktig for at historia vår ikkje skal gå tapt, seier kulturminister Hadia Tajik.

- Det er laga raudlister for artar og naturtypar som står i fare for å døy ut eller forsvinne. No går me i gang med å kartleggje tradisjonelle kulturutrykk for å sikre at ulike dugleikar innanfor kulturfeltet blir tekne vare på og vidareførte. Formålet med raudlista er å samle inn kunnskap før han forsvinn og å gjere kunnskapen tilgjengeleg for nye generasjonar, seier kulturminister Hadia Tajik.

Kulturministeren oppmodar alle til å sende inn forslag til lista slik at heilt lokale tradisjonar og dugleikar òg kjem med. Over heile landet finst historiske skattar, der bygder og område har sin lokale vri. Det er viktig å sikre utøvinga av til dømes dansar, folkeviser, husflidstradisjonar, leikar, matlaging, handverk, skiteknikkar og ritual.

Kulturdepartementet vil no setje ned eit fagutval som skal vurdere kandidatar til raudlista for kulturuttrykk. Innspel til kva som bør vere med på ei slik verneliste, kan ein sende på e-post til rodlista@kulturrad.no