Monument over Christian Frederik på Eidsvolls plass
Historisk arkiv
Publisert under: Regjeringen Stoltenberg II
Utgjevar: Kulturdepartementet
Pressemelding | Nr: 4/13 | Dato: 19.01.2013
Etter forslag frå Regjeringa har Stortinget bestemt at det skal reisast eit monument over Christian Frederik. Stortingets presidentskap har bestemt at monumentet skal plasserast på Eidsvolls plass. Monumentet skal avdukast i samband med grunnlovsjubileet i 2014.
- Christian Frederik var sentral i prosessen for å danne ein sjølvstendig norsk stat. Han spela ei viktig rolle i hendingar og prosessar som førte fram til Eidsvollsforsamlinga og Grunnlova, seier kulturminister Hadia Tajik. – Ved tidlegare grunnlovsjubileum har fleire tatt til orde for at det bør reisast eit monument over Christian Frederik. Med regjeringa si gåve til Stortinget i samband med feiringa av grunnlovsjubileet vert dette kravet endeleg oppfylt, seier kulturminister Tajik.
Kostnadsramma er stipulert til 5 millionar kroner. KORO, Kunst i offentlege rom, skal ha gjennomføringsansvaret for prosjektet.
Kunstutvalet for prosjektet vart oppnemnt i desember 2012. Utvalet består av fem representantar, der Stortinget og Kulturdepartementet har oppnemnt ein representant kvar. Dei tre andre er oppnemnde på kunstfagleg/kunstnarleg grunnlag.
Kunstutvalet består av:
Olga Schmedling, kunsthistorikar, leiar for utvalet
Kari Brandtzæg, kunsthistorikar
Per Hess, biletkunstnar
Per-Kristian Foss, Stortingets annan visepresident og leiar av Stortingets kunstutval, er oppnemnd av Stortinget
Lars Roar Langslet, tidlegare kultur- og vitskapsminister, oppnemnd av Kulturdepartementet
Kong Christian Frederik
Christian Frederik (1786-1848) var norsk konge i dei hektiske sommarmånadene i 1814. Han spela ei sentral rolle i hendingar og prosessar som førte fram til Eidsvollsforsamlinga og Grunnlova i 1814. Riksforsamlinga valde Christian Frederik til norsk regent 17. mai 1814.
Eit av Christian Frederiks viktigaste bidrag i den norske sjølvstendekampen skriv seg til fredsforhandlingane med Sverige i august 1814. Christian Frederik insisterte på at makta han hadde fått av folket, berre kunne førast tilbake til folket – og at ho ikkje kunne overførast til ein framand konge, slik Carl Johan kravde. Dermed måtte Stortinget samankallast. Ein konge som forstod makta si på denne måten, var noko grunnleggjande nytt i norsk og europeisk historie.
Christian Frederik tok den danske trona som Christian 8. i 1839.