Miljøverndepartementet skal i samarbeid med andre departement arrangere ein open høyringskonferanse om oppdateringa av den heilskaplege forvaltningsplanen for Barentshavet – Lofoten.

Stad: Thon Hotel Lofoten i Svolvær
Tid: 8. juni 2010

Eit oppdatert fagleg grunnlag for forvaltningsplanen vil vere utgangspunktet for presentasjonar og diskusjonar. Konferansen vil bli opna av miljø- og utviklingsminister Erik Solheim. Fiskeri- og kystminister Lisbeth Berg-Hansen og olje- og energiminister Terje Riis Johansen vil også halde innlegg.

På konferansen vil det bli høve til å diskutera ulike tema knytta til status og utvikling i forvaltingsplanområdet, med særleg fokus på ny kunnskap om havområdene, havet si tyding for verdiskaping og samfunn og miljøpåvirknad frå sektorane.

Oppdateringa av forvaltningsplanen for Barentshavet – Lofoten skal etter planen leggast fram i ein melding til Stortinget i innan 2010. Det faglege grunnlaget for oppdateringa blir lagt fram 15. april 2010 i ein rapport frå Fagleg forum for Barentshavet – Lofoten (felles rapport med overvakingsgruppa og risikogruppa). Det faglege grunnlaget vil seinare bli supplert med bakgrunnsmateriale om havområdet si tyding for økosystemtjenester, verdiskaping og samfunn. Det faglege grunnlaget vil bli gjort tilgjengeleg på nettsidene til Miljøverndepartementet.

Nærare informasjon om konferanseprogrammet og opplysningar om påmelding og overnatting vil bli sendt ut i byrjinga av april.