Miljøverndepartementet har oppnemnd nasjonalparkstyret for Møysalen nasjonalpark, Møysalen landskapsvernområde og Svellingsflaket landskapsvernområde i Nordland fylke.

Nasjonalparkstyret skal forvalte desse tre flotte verneområda. Dette er eit ledd i innføringa av lokal forvaltning av nasjonalparkar og andre store verneområde. Kommunane, fylkeskommunen og Sametinget får gjennom deltaking i nasjonalparkstyret ansvaret for å forvalte store nasjonale verdiar.

-Det er særs gledeleg at kommunane Hadsel, Lødingen, Sortland og Vågan saman med Nordland fylkeskommune og Sametinget vil ta ansvar med å ivareta dei unike naturverdiane i Møysalen nasjonalpark, Møysalen landskapsvernområde og Svellingsflaket landskapsvernområde med dyrelivsfreding. Nasjonalparkstyret får eit stort ansvar på vegne av heile nasjonen for å forvalte viktige nasjonale og internasjonale naturverdiar, seier miljøvernminister Bård Vegar Solhjell.

Nasjonalparkstyret for Møysalen nasjonalpark, Møysalen landskapsvernområde og Svellingsflaket landskapsvernområde med dyrelivsfreding vil bestå av Kjell-Børge Freiberg frå Hadsel kommune, Anita Marthinussen frå Lødingen kommune, Grete Ellingsen frå Sortland kommune, Børge Larsen frå Vågan kommune, Bente Anita Solås frå Nordland fylkeskommune og Arild Pettersen Inga som er utpekt av Sametinget.

Nasjonalparkstyret skal gjere vedtak og gjennomføre tiltak innafor ramma av verneforskriftene slik at naturverdiane i nasjonalparken og dei to landskapsvernområda vert sikra for komande generasjonar.

Innføringa av lokal forvaltning av desse verneområda skjer på bakgrunn av regjeringa sitt framlegg i Miljøverndepartementet sin budsjettproposisjon for 2010 (Prop. 1 S (2009-2010)) og som Stortinget har slutta seg til.