Miljøverndepartementet har utnemnd nasjonalparkstyret som skal forvalte Femundsmarka nasjonalpark i Hedmark og Sør-Trøndelag fylker og Gutulia nasjonalpark i Hedmark fylke.

Dette er eit ledd i innføringa av den nye forvaltningsmodellen for verneområde. Kommunane, fylkeskommunane og Sametinget får gjennom deltaking i nasjonalparkstyret ansvaret for å forvalte store nasjonale verdiar.

- Det er særs gledeleg at Engerdal og Røros kommunar saman med Hedmark fylkeskommune, Sør-Trøndelag fylkeskommune og Sametinget vil ta ansvar med å ivareta dei unike naturverdiane i Femundsmarka nasjonalpark, Gutulia nasjonalpark, Femundslia landskapsvernområde og Langtjønna landskapsvernområde. Nasjonalparkstyret får eit stort ansvar på vegne av heile nasjonen for å forvalte viktige nasjonale og internasjonale naturverdiar, seier miljøvernminister Bård Vegar  Solhjell.

Nasjonalparkstyret for Femundsmarka nasjonalpark, Gutulia nasjonalpark, Femundslia landskapsvernområde og Langtjønna landskapsvernområde vil bestå av: Lars Erik Hyllvang frå Engerdal kommune, Hans Vintervold frå Røros kommune, Mirjam Engelsjord frå Hedmark fylkeskommune, Hanne Moe Bjørnbet frå Sør-Trøndelag fylkeskommune og Mats Mortensson og Eva Nordfjell utpekt av Sametinget.

Nasjonalparkstyret skal gjere vedtak og gjennomføre tiltak innanfor ramma av verneforskriftene slik at naturverdiane i nasjonalparkane og landskapsvernområda vert sikra for komande generasjonar.

Innføringa av denne nye forvaltningsmodellen for verneområda skjer på bakgrunn av regjeringa sitt framlegg i Miljøverndepartementet sin budsjettproposisjon for 2010 (Prop. 1 S (2009-2010)). Stortinget har slutta seg til dette.