Miljøverndepartementet har utnemnd nasjonalparkstyret som skal forvalte Skarvan og Roltdalen nasjonalpark i Nord-Trøndelag og Sør-Trøndelag fylker og Sylan landskapsvernområde i Sør-Trøndelag fylke.

Dette er eit ledd i innføringa av den nye forvaltningsmodellen for verneområde. Kommunane, fylkeskommunane og Sametinget får gjennom deltaking i nasjonalparkstyret ansvaret for å forvalte store nasjonale verdiar.

- Det er særs gledeleg at Meråker, Selbu, Stjørdal og Tydal kommunar saman med Nord-Trøndelag fylkeskommune, Sør-Trøndelag fylkeskommune og Sametinget vil ta ansvar med å ivareta dei unike naturverdiane i Skarvan og Roltdalen nasjonalpark og Sylan landskapsvernområde. Nasjonalparkstyret får eit stort ansvar på vegne av heile nasjonen for å forvalte viktige nasjonale og internasjonale naturverdiar, seier miljøvernminister Bård Vegar  Solhjell.

Nasjonalparkstyret for Skarvan og Roltdalen nasjonalpark og Sylan landskapsvernområde vil bestå av: Bård Lanåsvold frå Meråker kommune, Inga J. Balstad frå Selbu kommune, Joar Håve frå Stjørdal kommune, John Paulsby frå Tydal kommune, Anne M. Mevassvik frå Nord-Trøndelag fylkeskommune, Guro Angell Gimse  frå Sør-Trøndelag fylkeskommune og Laila Bergstrøm, Lars Aage Brandsfjell og Mattis Danielsen utpekt av Sametinget.

Nasjonalparkstyret skal gjere vedtak og gjennomføre tiltak innanfor ramma av verneforskriftene slik at naturverdiane i nasjonalparken og landskapsvernområdet vert sikra for komande generasjonar.

Innføringa av denne nye forvaltningsmodellen for verneområda skjer på bakgrunn av regjeringa sitt framlegg i Miljøverndepartementet sin budsjettproposisjon for 2010 (Prop. 1 S (2009-2010)). Stortinget har slutta seg til dette.