Regjeringa legg opp til ei auka langsiktig satsing innafor fornybar energi i 2009. Ei vellukka satsing på fornybar energi og klimatilpassing krev ei heilskapleg tilnærming. Difor føreslår regjeringa at Noregs vassdrags- og energidirektorat (NVE) blir styrka innan desse forvaltingsområda, blant anna til auka fortgang i konsesjonshandsaminga av vind- og vasskraftprosjekt.

NVE blir styrka med 35 millionar kroner til konsesjonshandsaming, energiomlegging, fornybar energi og klimatiltak.

- Dette er eit stort løft for satsinga på fornybar energi. NVE har kø av konsesjonssøknader på vass- og vindkraft. Å få realisert enda fleire konkrete prosjekt innan vass- og vindkraft er viktig både av omsyn til å redusere utsleppa av klimagassar og for kraftforsyninga i landet, seier olje- og energiminister Terje Riis-Johansen.

Denne satsinga kjem i tillegg til den om lag 50 prosent kapasitetsauken i konsesjonshandsaminga som NVE fekk i 2008.