Auka satsing på kunnskapsoppbygging i Barentshavet – Lofoten

Regjeringa føreslår å løyve 200 millionar kroner til Oljedirektoratet si geologiske kartleggjing i Nordland VII og Troms II i 2009. Avsluttinga av det treårige kartleggjingsprogrammet vil gi ny kunnskap om ressursane i dette området og styrkje regjeringa sitt grunnlag for dei avgjerder som skal takast når forvaltingsplanen skal bli oppdatert i 2010.

-Regjeringa ser det som viktig å auke kunnskapen om dette området. Samstundes er vi er svært opptekne av å redusere konfliktar mellom petroleums- og fiskeriverksemdene, seier olje- og energiminister Terje Riis-Johansen. –Vi vil gjere det som trengs for å sikre ein best mogleg prosess, både for fiskarane og for Oljedirektoratet, og som følgjer opp vedtaket i Stortinget om innsamling av seismiske data.

Regjeringa varsla ved framleggjinga av stortingsmeldinga om forvaltingsplanen i Lofoten/Barentshavet i 2006* at dei ville styrkje kunnskapen om forvaltingsplanområdet på tre konkrete område: Sjøfuglprogrammet SEAPOP, kartleggjing av havbotnen ved MAREANO og geologisk kartleggjing i regi av Oljedirektoratet.

Oljedirektoratet si geologiske kartleggjing i Nordland VII og Troms II starta i 2007 og har gått for seg òg i 2008.

 

*St.meld. nr 8 (2005-2006) Helhetlig forvaltning av det marine miljø i Barentshavet og havområdene utenfor Lofoten (forvaltningsplan)