Bruk av CO2 for å auke oljeutvinninga

Oljedirektoratet har estimert eit betydeleg teknisk potensial for auka oljeutvinning ved hjelp av CO₂ i oljefelt på norsk kontinentalsokkel. Regjeringa har ambisiøse mål for å realisere CO₂-handtering og skape ei kjede for transport og injeksjon av CO₂ .
 
Etter kvart som oljefelt når ein moden fase, minkar trykket i reservoara, og det trengst ekstra trykkstøtte for å halde produksjonen ved lag. På ein del oljefelt på norsk kontinentalsokkel blir vatn eller naturgass nytta som trykkstøtte for å halde produksjonen oppe. Injisering av CO₂ kan vera eit alternativ eller supplement til bruk av vatn eller naturgass som trykkstøtte. CO₂ er i visse tilfelle blandbar med reservoaroljen, og kan dermed medverke til å auke utvinninga ut over det ein kan oppnå med vass- eller gassinjeksjon.

Det er store utfordringar ved bruk av CO₂ for å auke oljeutvinninga frå felta på norsk kontinentalsokkel. Spesielt kostar det å modifisere eksisterande installasjonar og utstyr for injeksjon og etterbehandling av tilbakeprodusert CO₂. Fleire av dei aktuelle kandidatane for CO₂-injeksjon inneheld store mengder gass, og tilbakeprodusert CO₂ må separerast frå gassen i samsvar med salsgasspesifikasjonane. Slike prosessar er plasskrevjande, og i mange tilfelle vil det vere nødvendig å byggje ein ny installasjon for å få plass til utstyr. Eit oljefelt har behov for leveransar av CO₂ i ein mykje kortare periode enn det som er venta levetid for eit gasskraftverk. I tillegg vil behovet for tilført CO₂ minke etter kvart som stadig meir CO₂ blir produsert med prosesstraumen. Det er ikkje nødvendigvis samsvar mellom tilgangen på CO₂ frå eit gasskraftverk og behovet for CO₂ til eit oljefelt. Difor trengst det ein infrastruktur for CO₂-transport som gjer det mogleg å lagre CO₂ etter kvart som behovet for CO₂ til auka oljeutvinning på eit felt blir redusert og oljeproduksjonen blir stengd ned. Det er behov for store volum av CO₂ når ein vil nytte CO₂ til å auke oljeutvinninga. CO₂ frå berre ei punktkjelde vil ikkje gje tilstrekkeleg volum for optimal injisering i oljefelt. Det vil difor kunna vere nødvendig å skaffa CO₂ frå fleire kjelder i Noreg eller frå utlandet.

(oppdatert 15. august 2008)