Samferdselsministeren skal ikkje betala tilleggsskatt

Skatt Vest har i vedtak av 20.12.2010 konkludert med at samferdselsminister Magnhild Meltveit Kleppa ikkje skal betala tilleggsskatt for armbandet ho mottok då ho var stortingsrepresentant i 2007.

Verdien på armbandet er sett til 15 250 kroner. Dette beløpet blir lagt til inntekta hennar for inntektsåret 2007.

- Eg er glad og letta for at eg no kan leggja denne saka bak meg, seier samferdselsminister Magnhild Meltveit Kleppa, som tek avgjerda frå Skatteetaten til etterretning.
 
Meltveit Kleppa fekk armbandet i gåve då ho var gudmor for ei ferje. Ho leverte armbandet tilbake til verftet i haust. Ho ba samstundes likningskontoret om ei vurdering av eventuelle skattemessige følgjer av denne saka.