Posten Norge AS: Ny konsesjon

Samferdselsdepartementet har i dag gitt Posten Norge AS ein ny konsesjon, for perioden 1. januar 2007 til 31. desember 2010.

Formålet med konsesjonen er å sikre eit landsdekkjande tilbod med formidling av leveringspliktige tenester til rimeleg pris og til god kvalitet.

Konsesjonen vidarefører Posten sin einerett til formidling av lukka, adressert brevpost med vekt inntil 50 gram og med pris inntil to og ein halv gonger grunntaksten for eit innanriks prioritert brev innanfor første vektklasse (20 gram).

- Posten er ei nøkkelverksemd for å sikre næringsliv og busetting i heile landet. Ei vidareføring av eineretten er grunnleggjande og viktig for å få likeverdige og gode posttenester i heile Noreg. Eineretten gjer det dessutan mogeleg å oppretthalde eit krav om geografisk einskapsporto innanfor einerettsområdet, seier samferdselsminister Liv Signe Navarsete.

Den nye konsesjonen vidarefører i stor grad dagens konsesjon, men inneheld somme nye føresegner om blant anna målbruk og universell utforming av Postens tenestetilbod. Reglar for postkasseplassering er òg tatt inn i konsesjonen, basert på gjeldande retningslinjer utarbeidde av Posten og Post- og teletilsynet.

Konsesjonen innfører ei maksimalprisordning for dei leveringspliktige tenestene utanfor eineretten, slik at prisen på desse tenestene i gjennomsnitt ikkje skal stige meir enn Statistisk Sentralbyrås lønnsindeks for samferdselssektoren. Denne typen tenester omfattar mellom anna prioritert og uprioritert brevpost inntil 2 kilo, lettgods inntil 20 kilo, ettersending og oppbevaring av post og formidling av verdisendingar.

Tenester innanfor eineretten skal framleis ha ein kostnadsorientert pris, som skal førehandsgodkjennast av Samferdselsdepartementet.

Konsesjonen legg til grunn at det framleis skal vere eit tilbod om grunnleggjande banktenester i ekspedisjonsnettet til Posten.

- Det er viktig at Posten er til stades med banktenester der det ikkje finst andre alternativ, seier samferdselsminister Liv Signe Navarsete.

Regjeringa arbeider for tida med ei stortingsmelding om verksemda til Posten (eigarmeldinga). Spørsmål knytt til grunnleggjande banktenester vil bli tatt opp i denne meldinga.

---------------------------------------------------------------------------

Konsesjon til Posten Norge AS for 2007 - 2010