Ras- og flaumskadar på vegnettet: 39 millionar kroner i ekstra løyvingar

- Regjeringa har i statsråd i dag gjort framlegg om at det over statsbudsjettet for 2007 skal løyvast i alt 39 millionar kroner for å dekkje ekstra utgifter som Statens vegvesen har hatt på grunn av ras- og flaumskadar på vegnettet. I  år har der vore fleire tilfelle med lokalt veldig store mengder nedbør på kort tid. Utgiftene til rydding og utbetring av vegen og til andre strakstiltak er blitt større enn det ein normalt kan vente, opplyser samferdselsminister Liv Signe Navarsete.

Ekstrakostnadene for å utbetre rasskadane er på landsbasis rekna til 14,6 millionar kroner, medan ekstrakostnadene for å utbetre flaumskadane er på 24,4 millionar kroner.

Ekstraløyvinga på i alt 39 millionar kroner omfattar budsjettposten ”Tilsyn, drift og vedlikehald av riksvegar” og er fordelt slik til fleire prosjekt og tiltak:

Oppland
3 millionar kroner er sett av til utbetring av flaumskadar på riksveg 245 Lomsdalen, ved Dokka, 0,2 millionar kroner gjeld flaumskadar på stamvegstrekninga E16 Buskerud grense – Fagernes og 0,2 millionar kroner går til utbetring etter flaumskadar på riksveg 33 Tonsåsen.

Buskerud
10,3 millionar kroner er ført opp til utbetring etter flaumskadar på riksvegar i øvre Buskerud, medan 5,9 millionar kroner er sett av til utbetring etter flaumskadar i Kongsberg.

Telemark
2,7 millionar kroner er sett av til utbetring av rasskadar ved Mannebru på riksveg 36, til mindre rastiltak i fylket er det ført opp 0,3 millionar kroner, medan 1,5 millionar kroner gjeld flaumskadar på fleire riksvegstrekningar i øvre Telemark.

Hordaland
Til utbetring etter rasskadar på riksveg 550 Odda – Utne er det sett av 5 millionar kroner.

Nord – Trøndelag
Til utbetring etter rasskadar på riksveg 17 og riksveg 74  er det ført opp 0,6 millionar kroner, medan 1,3 millionar kroner går til fleire mindre flaumtiltak i fylket.

Troms
2 millionar kroner er sett av til utbetring etter rasskadar på riksveg 91 Ura.

Finnmark
3 millionar kroner til utbetring etter ras på riksveg 93 Kløfta.

I tillegg er 1 million kroner sett av til fleire mindre rastiltak innanfor området til Statens vegvesen Region nord, medan 2 millionar kroner gjeld fleire mindre flaumtiltak innanfor området til Statens vegvesen Region Sør.

For fleire opplysningar:

• St.prp. nr. 24 (2007 – 2008) Om endringar i statsbudsjettet for 2007 mv. under Samferdselsdepartementet