Transportsystemet på Jæren: Prinsipp for vidare utbygging

- Føremålet med ei ny Jærenpakke er å utvikle eit trygt og effektivt transportsystem, der kollektivtrafikk, syklande og gåande får høgare prioritet enn det som er tilfelle i dag. Regjeringa legg til grunn at vidare utvikling av transportsystemet på Jæren skal ta utgangspunkt i ”Busway-konseptet”.

Dette seier statssekretær Geir Pollestad i samband med at Samferdselsdepartementet - på bakgrunn av behandling i regjeringa - no har  fastlagd prinsipp for den vidare utvikling av transportsystemet på Jæren.

Samferdselsdepartementet har fastlagd desse prinsippa:

• Utvikling av transportsystemet på Jæren skal baserast på ”Konsept K3A Busway”, det vil seie ei buss- og jernbanebasert vidareutvikling av transportsystemet.
• For utbygging av hovudtraseen for kollektivtrafikken mellom Stavanger, Forus, Sandnes og Sandnes Aust, skal det leggjast til rette for ei mogleg framtidig omlegging til bybane. For utbygginga av Sandnes Aust, skal det  leggjast til grunn at det blir etablert eit høgverdig kollektivtilbud parallelt med utbygginga av området.
• Så langt det er praktisk mogleg og økonomisk forsvarleg legg regjeringa til grunn at det blir bygd samanhengande kollektivtrasear slik at ein sikrar punktleg trafikk og høg kapasitet og føreseieleg forhold for  byutvikling langs traseane.

Regjeringa har behandla saka med bakgrunn i ei konseptvalutgreiing (KVU) om transportsystemet på Jæren, ei ekstern kvalitetssikring (KS1) utført av  konsulentgrupperinga Det Norske Veritas AS, Advansia AS og Samfunns- og næringslivsforsking AS, behandling av saka i Rogaland fylkeskommune og i dei kommunane som er omfatta av saka. Rogaland fylkeskommune har leia arbeidet med konseptvalutgreiinga og har også stått for høyring av saka hos kommunane.

- Konseptvalutgreiinga og kvalitetssikringa vil danne grunnlaget for vidare planlegging og drøfting av finansieringsløysingar for større samferdselstiltak, blant anna for det vidare arbeidet med utforminga av Jærenpakke 2. Føremålet er å utvikle eit transportsystem der kollektivtrafikk får høgare prioritet enn det som er tilfelle i dag. Dersom Stortinget sluttar seg til ei ny Jærenpakke 2 innan utgangen av 2016, vil den nye pakka avløyse vidareføringa av dagens ordning, seier statssekretær Geir Pollestad.

For fleire opplysningar - sjå brev av 8. april 2013 frå Samferdselsdepartementet til Vegdirektoratet og Rogaland fylkeskommune (pdf)