Arbeid for sysselsetjing godt i gang

Statsminister Jens Stoltenberg og fleire statsrådar møtte i dag underliggjande etatar for å diskutera arbeidet med å møta verknadene av finanskrisa. – Etatane har i dag orientert oss om at arbeidet med å setja i verk tiltakspakken er godt i gang, sa Stoltenberg etter møtet.

Statsminister Jens Stoltenberg og fleire statsrådar møtte i dag underliggjande etatar for å diskutera arbeidet med å møta verknadene av finanskrisa. Foto: Statsministerens kontor.

– Den internasjonale finanskrisa kan bli djupare og meir langvarig enn det prognosane kunne tyda på for ei tid tilbake. Dette illustrerer behovet for den tiltakspakken som er lagt fram, sa Stoltenberg.

Vegdirektoratet, Jernbaneverket, Statsbygg, Enova, Innovasjon Norge og NAV deltok på møtet. Frå regjeringa deltok statsminister Jens Stoltenberg, samferdselsminister Liv Signe Navarsete, arbeids- og inkluderingsminister Dag Terje Andersen, nærings- og handelsminister Sylvia Brustad og olje- og energiminister Terje Riis-Johansen.

– Me ser no at arbeidsløysa i nabolanda våre aukar. Difor må me vera førebudde på at talet på arbeidslause vil auka også i Noreg, sa Stoltenberg.

Statsministeren peika på at regjeringa no er oppteken av at pengane frå regjeringa sin tiltakspakke byrjar å fungera og at NAV fungerer. Regjeringa vil seinast 20. mars leggja fram ein proposisjon for Stortinget om situasjonen i NAV.