Statsminister Jens Stoltenberg deltok i dag i ein paneldiskusjon i Stockholm om tiltak for å få unge inn på arbeidsmarknaden.

– Det viktigaste me kan gjera for å motverka høg arbeidsløyse blant unge er å leggja til rette for ein god arbeidsmarknad med høg etterspørsel etter arbeidskraft, slik at me unngår høg arbeidsløyse generelt. Den viktigaste årsaka til at arbeidsløysa blant ungdom i Noreg er låg, er at den generelle arbeidsløysa er låg, seier Stoltenberg.

Diskusjonen i Stockholm er ein del av det nordiske statsministermøtet, der Danmark, Finland, Island, Noreg og Sverige er representert. På arbeidsmarknadsmøtet i Stockholm deltok også dei nordiske arbeidsministrane.

Stoltenberg la blant anna vekt på at Noreg i mange år har hatt ein ungdomsgaranti for å få fleire unge inn i arbeid eller utdanning.

–  I Noreg har me hatt ein ungdomsgaranti i mange år og me har gode erfaringar med det. Me er glade for at EU no anbefaler ein slik garanti til alle sine medlemsland, seier Stoltenberg.

Den norske ungdomsgarantien går ut på at ungdom som har behov for bistand for å koma i arbeid, raskt skal få eit tilbod som er tilpassa den enkeltes behov.

Regjeringa styrkte nyleg garantiordningane for ungdom i alderen 20-24 år. Det skal raskt utarbeidast ein individuell plan for korleis den enkelte skal koma i arbeid eller utdanning. Aktivitetsplanen inneheld virkemiddel frå NAV, men også tilbod frå andre tenester dersom det er behov for det, til dømes knytt til skule, rus eller helse. No er også ungdomar som har nedsett arbeidsevne ein del av målgruppa for garantiane. 

Les meir om møtet om det nordiske arbeidsmarkedsmøtet.