Eit nytt offentleg utval skal sjå på
statleg støttepolitikk overfor barne- og
ungdomsorganisasjonane
Eit offentleg utval som skal vurdere den statlege
støttepolitikken overfor dei frivillige barne‑ og
ungdomsorganisasjonane, blei i dag oppnemnt i statsråd. – Barne‑ og
ungdomsorganisasjonane speler ei viktig rolle i oppveksten til born
og unge. Vi må derfor syte for at politikken overfor desse
organisasjonane er i tråd med endringar i organisasjonslivet og i
samfunnet, seier barne‑ og familieminister Laila Dåvøy.
– Born og unge viser eit stort
engasjement, og mange lèt dette kome til uttrykk gjennom barne‑ og
ungdomsorganisasjonar. Men eit samfunn i endring, der mellom anna
ny teknologi får ein stadig større plass i kvardagen til folk
flest, opnar for nye former for deltaking og engasjement. Dette
påverkar organisasjonane og den rolla dei speler i samfunnet, seier
Dåvøy.
Utvalet skal på bakgrunn av dette
greie ut prinsipielle spørsmål omkring kva rolle dei frivillige
barne‑ og ungdomsorganisasjonane speler i samfunnet, og greie ut og
kome med forslag til korleis statlege styresmakter kan sikre best
moglege rammevilkår for å fremje utvikling av og vekst i
organisasjonane. Utvalet skal levere ein rapport innan 30. juni
2006.
– Vi har hatt det klart for oss at
vi ønskjer unge, engasjerte menneske inn i utvalet, personar med
kjennskap til barne‑ og ungdomsorganisasjonar og nye trendar blant
unge, seier Dåvøy om medlemmene i utvalet.
Samansetjinga av utvalet:
Forskar
Guro Øydegard (leiar), Oslo (37)
Næringsrådgivar
Dilek Ayhan, Bærum (26)
Student
Hans Augun Parmann, Tromsø (23)
Nettredaktør
Christoffer Grønstad, Gjøvik (27)
Student
Christer Hodne Bjørge, Bergen (23)
Dagleg leiar
Kristin Aase, Oslo (44)
Advokat
Ramborg Elvebakk, Oslo (44)
Seniorforskar
SveinIngve Nødland, Stavanger (50)
Lærar
Alise Narjord, Røyken (26)
