Utstein-gruppa får internasjonal pris

Utstein-gruppa, der utviklingsminister Hilde Frafjord Johnson er ein av fire opphavelege medlemmar, mottar tysdag 29. april kl. 18.00 prisen "2003 Commitment to Development Award" i Washington D.C.

Center for Global Development og tidsskriftet Foreign Policy har vald Utstein-gruppa som fyrste vinnar av ein pris som skal delast ut kvart år til "eit individ, ei gruppe eller organisasjon som har gjort ein vesentleg innsats for å endre haldningar og politikk i den rike delen av verda i høve til verdas fattige".

Utstein-gruppa får prisen for sin "visjon og vilje for å redusere global fattigdom og ulikskap, for si evne til å tenkje nytt innan utviklingsfeltet og for deira vektlegging av politisk samordning når det gjeld å få til resultat".

Det er dei fire opphavelege Utstein-medlemmane som får prisen: Tidlegare utviklingsminister i Nederland, Eveline Herfkens, utviklingsminister i Storbritannia, Clare Short, minister for økonomisk samarbeid og utvikling i Tyskland, Heidemarie Wieczorek-Zeul, samt utviklingsminister Hilde Frafjord Johnson. Utstein-gruppa vart danna i 1999 etter eit fyrste møte på Utstein Kloster i Rogaland. Som eit effektivt kontaktnettverk har Utstein-samarbeidet medverka til auka gjennomslagskraft for gruppas utviklingspolitikk i internasjonal samanheng.

Pressekontakt: Informasjonssjef Espen Gullikstad, mobil 91 70 81 22

Vedlagt er pristildelarane si eiga pressemelding (word).