Historisk arkiv

Utviklingsministeren møter leiaren for det internasjonale gjeldsletteinitiativet (HIPC)

Historisk arkiv

Publisert under: Regjeringen Bondevik II

Utgiver: Utenriksdepartementet

Utviklingsminister Hilde Frafjord Johnson møter torsdag 26. februar Vikram Nehru, leiaren for det internasjonale gjeldsletteinitiativet "Heavily Indebted Poor Country Initiative" i Verdsbanken (HIPC). (24.02.04)

Pressemelding

Nr.: 14/04
Dato: 24.02.2004

Utviklingsministeren møter leiaren for det internasjonale gjeldsletteinitiativet (HIPC)

Utviklingsminister Hilde Frafjord Johnson møter torsdag 26. februar Vikram Nehru, leiaren for det internasjonale gjeldsletteinitiativet "Heavily Indebted Poor Country Initiative" i Verdsbanken (HIPC).

Noreg legg stor vekt på det internasjonale arbeidet for å handtere utviklingslanda sin gjeldssituasjon. Bakgrunnen for besøket er Noreg si aktive rolle for å betre HIPC-initiativet. Initiativet vart lansert i 1996 og utvida i 1999. HIPC-initiativet koplar sletting av gjeld på ein systematisk måte til utviklingsfremjande og fattigdomsorientert politikk. Det er 28 land som gjennom HIPC vil få ein drastisk reduksjon i gjeldsbyrda på til saman 41 milliardar dollar. Mange av landa har allereie no kunna auka utgiftene til mellom anna helse og utdanning markant som eit resultat av HIPC. Ytterlegare 10 fattige land vil kunne få HIPC-status dersom dei kjem ut av krig og konflikt. Statusen til HIPC-initiativet, framdrift og finansiering vil vere viktige tema under møtet. Utviklingsministeren vil vidare orientere om arbeidet med Regjeringa sin nye handlingsplan for gjeldslette og utvikling.

Nehru er ikkje bare leiar for Verdsbanken sin HIPC-mekanisme, men han er òg fagøkonom og ekspert på multilateral gjeldslette og fattige land sin gjeldssituasjon. I tillegg til å møte utviklingsministeren, skal Nehru møte nestleiaren i Stortinget sin utanrikskomité, representantar frå andre nordiske land som inngår i den nordisk-baltiske valgruppa i Verdsbanken, Aksjon Slett u-landsgjelda (SLUG) og andre norske organisasjonar som er opptatt av spørsmålet.

Priv. til red:

Vikram Nehru og Hilde Frafjord Johnson vil kunne vere tilgjengelege for intervju i etterkant av møtet torsdag 26. februar, ca kl. 10 45. Kontakt informasjonsrådgivar Odd Naustdal for eventuell avtale. Telefon 22 24 30 12 / 911 49 490