Erklæring frå den høge representanten på vegner av Den europeiske unionen om situasjonen for menneskerettsforkjemparar i Nord-Kaukasus (15.07.10)

EU er uroa over truslane som nyleg er sette fram mot Memorial og klagemåla som er retta mot direktøren i organisasjonen, Oleg Orlov.

EU minner om kor viktig det er å verne om menneskerettsforkjemparar i Russland og resten av verda og å la dei utøve verksemda si fritt i samsvar med erklæringa frå FNs generalforsamling om menneskerettsforkjemparar, som vart vedteken i 1998.

EU oppmodar på det sterkaste styresmaktene i Den russiske føderasjonen om å få slutt på tradisjonen for straffridom og på frykta som rådar i Nord-Kaukasus generelt og i Tsjetsjenia spesielt, og unionen håpar at det raskt vil kome resultat frå granskinga av mordet på Natalia Estemirova – slik president Medvedev erklærte etter mordet – og andre menneskerettsforkjemparar i Den russiske føderasjonen.

Søkjarlanda Tyrkia, Kroatia*, Den tidlegare jugoslaviske republikken Makedonia* og Island+, dei potensielle søkjarlanda Bosnia-Hercegovina og Montenegro, som er med i stabiliserings- og assosieringsprosessen, Efta-landa Liechtenstein og Noreg, som er medlemer av Det europeiske økonomiske samarbeidsområdet, og Georgia sluttar seg til denne erklæringa.

* Kroatia og Den tidlegare jugoslaviske republikken Makedonia er framleis med i stabiliserings- og assosieringsprosessen.

+ Island er framleis medlem av Efta og Det europeiske økonomiske samarbeidsområdet.