Pressemelding

Nr.: 05109
Dato: 10.11.2005

Statsbudsjettet:

Sterkare innsats mot fattigdom blant born

Innsatsen i kampen mot fattigdom blant born og unge skal forsterkast. I tillegg vil regjeringa styrkje arbeidet for lesbiske og homofile, greie ut ei kjønnsnøytral ekteskapslov, opprette ein likelønnskommisjon og intensivere arbeidet mot tvangsekteskap, kjønnslemlesting og menneskehandel.

– Forsterka innsats for born og familiar som lever i fattigdom, har første prioritet når vi no føreslår å omdisponere midlar på budsjettet, seier barne‑ og likestillingsminister Karita Bekkemellem.

Auken på 7,6 millionar kroner til dette formålet skal kanaliserast gjennom barnevernet og gå til kunnskapsutvikling og betre samordning av ulike tenester for slike familiar. Barne‑ og familiedepartementet*) og Barne‑, ungdoms‑ og familiedirektoratet (Bufdir) samarbeider med Arbeids‑ og sosialdepartementet og Sosial‑ og helsedirektoratet om forsterka og meir samordna innsats mot fattigdom. Til no har 17 kommunar delteke aktivt i dette samarbeidet, og ytterlegare tre kommunar er inviterte.

Regjeringa føreslår å styrkje arbeidet for lesbiske og homofile med 1,9 millionar kroner i forhold til forslaget frå Bondevik-regjeringa. Det gir rom for auka driftsstøtte til publikasjonen Blikk og til Landsforeningen for lesbisk og homofil frigjøring (LLH) og for støtte til tiltak i regi av andre homopolitiske organisasjonar. Det gjer det også mogleg å gi midlar til oppfølging av antidiskrimineringsprosjektet.

– I tillegg til denne auken vil vi setje av pengar til utgreiing av ei kjønnsnøytral ekteskapslov, understrekar Karita Bekkemellem.

Regjeringa vil også setje av éin million kroner for å opprette ein likelønnskommisjon.

Omdisponeringane på budsjettet for Barne‑ og familiedepartementet utgjer totalt 12,2 millionar kroner og inneber at den føreslåtte auken i løyvingane til samlivstiltak som Bondevik-regjeringa føreslo, ikkje blir noko av. Samlivstiltaka blir vidareførte på same nivå som i 2005.

Endringar i kontantstønaden

Regjeringa går vidare inn for å endre kontantstønadsordninga. Forslaget inneber at kontantstønad blir gitt til og med kalendermånaden før barnet fyller tre år, og at kontantstønad for adopterte born kan givast for maksimalt 23 månader frå det tidspunktet ein får rett til kontantstønad. Dette inneber at kontantstønad blir utbetalt for éin månad mindre enn etter dei nogjeldande reglane. Endringa gir ei årleg innsparing på 75 millionar kroner.

I tillegg kjem regjeringa til å redusere satsane for kontantstønad. Etter forslaget blir full kontantstønad redusert frå 43 884 kroner til 39 636 kroner per år (frå 3657 til 3303 kroner per månad). Det gir ei årleg innsparing på 258 millionar kroner.

Auka løyving til barnevernet

Regjeringa vil også auke løyvinga til det nye statlege barnevernet med 150 millionar kroner meir enn det som var føreslått i budsjettforslaget frå Bondevik-regjeringa.

– Det kan verke som om det statlege barnevernet har slite med ei underbudsjettering. Løyvingane har ikkje vore store nok til å fange opp veksten i talet på klientar i barnevernet og til å dekkje kostnadene knytte til omstilling og kvalitetsheving i tenesta, understrekar barne‑ og likestillingsminister Karita Bekkemellem.

I Soria Moria‑erklæringa varsla regjeringspartia at dei vil overføre omsorgsansvaret for einslege, mindreårige asylsøkjarar frå utlendingsstyresmaktene til barnevernet. Barne‑ og familiedepartementet*) vil greie ut spørsmåla knytte til ei slik overføring og kome tilbake med ein nærmare omtale i Revidert nasjonalbudsjett 2006.

*) Frå 1.1.2006: Barne‑ og likestillingsdepartementet

–––––––––––––––––––––––––––––––––––––––––––––––––––––––––––––––––––––––––––

Priv. til red.:

Pressekontaktar om budsjettet for 2006 i BFD:

Informasjonssjef Ragnhild Samuelsberg 22 24 24 15 / 97 56 76 77

Seniorrådgivar Torstein Rudi 22 24 24 09 / 91 69 69 25